قد إيه حبك يامصر (مربعات من فن الواو)

السر فى عقولنا

ولا القلوب ماتت

وازاى بقوا غولنا

وكبيرنا ليه ساكت

من عمر واحنا اتباع

ومعادش ينفع قول

عزيزنا راح واتباع

واحنا وراه على طول

قادر يعود اليوم

نرفع وفيه راسنا

نقتل بإيدنا البوم

نسجن فى حرّاسنا

ابنى هناك اخدوه

وجوّزوه منهم

ابوس ايديكو هاتوه

وابعدوه عنهم

كان عندى انا ولدين

واحد شهيد سينا

والتانى لصغر زين

اخدوه وما نسينا

معنى الكلام دا ايه

خلاص كدا خلصنا

وليه سايبينه ليه

كاتم على نفسنا

الواد يا عادل بعت
طالب يعود لينا
والنار فى قلبى رعت
من حدنا لسينا
***
الزهيرى

على راسى لفيت شال

إتفك واتخبّل

عنى ماحدش شال

وفكرى متخبل

***
الزهيرى

ما قدرش أخطى هناك

قوم أنت روح هاته

عمه و عايجى معاك

وتقل آهاته

***

الزهيرى

وقبل ما توصل

يرمى عليها يمين

لا بالنسب توصل

لينا بنات ملاعين

***

الزهيرى

خلى السوهاجى يروح

وياك لحد الواد

وبقولكوا داووا جروح

أنتوا عمام أجواد

***

الزهيرى

إن حن للحشاكان

شقوه وهاتوه نصين

بكفاية كل ما كان

الكل ليه باصين

***

الزهيرى

ما عارفش ليه عاترف

عينى لمكتوبه

ودماغى فيه عاتلف

والفكر ساب توبه

***

الزهيرى

خايف يكون الوجع

من جتته إتملّك

إن جه معاك وارتجع

حاوره عشان مال لك

***

الزهيرى

إن ظنى كان فى محل

إرمح به لأى حكيم

ظهرى يا خويا إتحل

ما قادرشى فيه تحكيم

***

الزهيرى

المشكله مش أبنكم

دى مشكلة أجيال

والحل لو عندكم

ياريت يكون ف الحال

يا صاحبتى المشكله

دى مش وليدة يوم

إزاى بقى المسأله

تتحل فجأه ف يوم

العله فى المبتدى

لما تركنا الدين

قدروا علينا العدا

ولا عادش لينا معين

لما نسينا الله

نسانا أنفسنا

خلى هواننا مداه

م القدس للبوسنه

المعتصم بالله

حارب عشان واحده

قالت ومعتصماه

والصرخه كات واحده

جمع جيوش وعتاد

خد حقها متلت

كات أمة الأمجاد

ولا عمرها اتذلت

دلوقت قولوا الآه

ولا جند ولا عسكر

حتلاقو معتصماه

من دمكوا بيسكر

بيبيع فى أرض وعرض

ويقول فى أناشيده

طاعة الولى دى فرض

والسنه تأييده

الله عليك يا فؤاد

والله وعندك حق

الكل همه الواد

ولا حد بيقول لأ

تبقى البدايه أكيد

يحكمنا راجل حر

والإيد تكون فى الإيد

نسقى لعدانا المر