مربعات فى فن الواو

1



اوعك تقولى انى بايعك

وانتى ف عبادتى النبيه

لوصل ودادك وابايعك

واديكى تتحنى بيا



2



انتى البصر والبصيره

وانتى ف سمايا يمامه

وعنيكى ف الحب سيره

تحكيبها زرقا اليمامه



3



اهل الهوى معشمينى

بطيور عنيكى الجوراح

تفطر وتتعشى منى

وتهز فيا الجوارح



4

انا كل اهلك وناسك

وانتى مناخى وطقسى

ف عنيكى راهب وناسك

ومأدى ف الحب طقسى



5

ليكى الرباط المقدس

وانت اللى منك رباطى

اراجوز وهمه مكدس

فمتلعبيش اكروباتى



6



ف شباك عنيا انتى جونه

ف الصوره شاعرى واديبى

وانتى هوا انتيجونه

وانتى اللى عايشه ف اوديبى



7



فايتانى للحيره مكروب

نعسان وحالف منامشى

والحب قاتل وميكروب

يا هيمشى يا اما انا امشى

8


انتى لهيبى ومشاعلى

وانتى حياتى وترفها

سايبالى حبك مشاع لى

وعنيا بُعدك طرفها



9



من غير معاد شميتينى

كتمانى فايح ف ريحتى

لما أبوح شمتينى

والا ببوحى فرحتى



10



قلبى ف حضنك مجافياه

بعد اما اشواقى لافت

ياه من سنينى العجاف ياه

والهم ف عنيكى لافت



11



احلف بأن انتى طينى

وانتى اللى قلبى مطارداه

عاشقك وادمنتى تينى

وبغيره عينك ما ترضاه



12



خدتى من الحسن شطرُه

واديتلك اللى فضل له

لو قلبى ينفع نشاطره

كنت احتويكى ف ضله



13



خليتى قلبى غوانى

ومشيت برسمك ونقشك

وانتى عنيكى الغوانى

جابرانى احلف ما اناقشك



14



سبتينى ليلى بلا نهار

وان كان هوانى بلانى

ان زحتى عنى البلا انهار

وان خفتى منى بلانى

15

انتى اللى ماضيه وانا الحالى

والحيره مستقبليه

التوهه نبضى ولسان حالى

والقلب مستاء بليّه

حسن الجمال. كتب:

مش لاقى رد وماعارف
اوصف لوواك مواصف
ياللى انت صاحب معارف
عاجز وخاشمى ما واصف
...............................
من صغر سنك كما الناى
تبكى عليك الربابة
الشعر بيتك وغناى
تدخل ولا تدق بابه
.........................
الله الله الله ياأسامة ووات ولا أروع
وعندى ملحوظة بسيطة على المربع الاخير
اعتقد ان عروض البيتين بهما تزييل
انتى اللى ماضيه وانا الحالى
التوهه نبضى ولسان حالى
فيهم سبب خفيف زيادة يمكن تكون قراءتى لهما تختلف عن نطقهما كما كتبتهما انت
ولكن انت ابدعت يااسامة
تحياتى لك ايها الرائع

الأستاذ حسن الجمال : اولا لازم ابدأ بشكرك وواواتك الجميله .. ثانيا ما قلته صحيح تماما عن المربع الأخير .. عن الترفيل وليس التذييل فى الشطر الأول والثالث .. فالترفيل هو زيادة متحرك أو سبب خفيف على اخر التفعيله اما التذييل فهو زيادة ساكن .. والتذييل لا يؤثر على التفاعيل اتباعا لقاعدة عدم التقاء الساكنات فى اللغه .. انا كنت واعى وانا بكتب المربع للترفيل فى المربع .. من يوم ابن عروس ما بدأ الواو وفاعلاتن بتيجى كما هى او فاعلان وفعلاتن الإعتياديتين .. لكنها كانت تجربه للأمانه .. تجربه فى النطق ليست ف الكتابه وهذا هو التوصيف المباشر والأساسى لمربع الواو .. فجناس الواو سواء كان تاما او منقوصا هو جناس لفظى وليس جناس أحرف .. ف الحقيقه وجدت نطقها ثقيل على اللسان مع ان المربع لا يخترق اى قاعده عروضيه فالزحافات تجرى على الكم لا على الكيف .. طبقا للإجازات الرياضيه .. لكن برغم ان المربع لاقى استحسان شعراء كتير سمعوه لكنهم قالولى نفس ملاحظة حضرتك .. شكرا جزيلا ليك على اضافتك الجميله

عادل عوض سند كتب:

الله عليك يا اسامه

مربعات كتبت بعنايه ومهاره كما كتبها اصحابها .

انت شاعر جميل ومبدع ..

مودتى وتحيتى ..

هههههههههه .. بالطبع يا أستاذ عادل انا محسوب على الصعيد جغرافيا لأنى فيومى .. لكن لهجتى قاهريه زى اهل الفيوم مع اختلافات بسيطه .. عندنا ف الفيوم شعراء كبار بيكتبوا الواو أمثال الشاعر الكبير (محمد عبد المعطى) رحمه الله .. والشاعر محمد حسنى والشاعر عبدالكريم عبد الحميد والشاعر حازم حسين ... انا بحاول اجيب جديد لكن ف الواو بالذات انا بعانى من الحرفيه الشديده للشعراء فى بلدى ... الف شكر لحضرتك

أحمد عبد الرازق كتب:

جميل بجد انت يا اسامه
كدا زاد اقتناعي ان الواو (الرائع) ليس حكرا علي شعراء قبلي
ومبقاش حسن الجمال بس الي واخد السكه دي في المنتدى
أبدعت يا اسامه واسمتعت انا

بجد ومش مجامله يا احمد .. لا اظن ان متعتك فى تلقى مربعات بسيطه قد تفوق مدى استمتاعى بنصك الأخير فانت شاعر موهوب جدا .. شكرا ليك