فضفض .....

فيه حاجة مش مظبوطة وانت غشيم
عمال تبلبع ف البشر....... وتهيم
أخر حضور الخلق كان جواك
علي شكل طعنه
بيد... حد
كريم
..
مضحكش لما لمحته ومخباش
قالك سامحنى
وانفعاله
مجاش
الدنيا اصعب منها لو تتعاش
ويقولوا بطل تبقي فيها
سليم
...
..
ــــــــــــــــ
انا مش ملاك ولا بادعي
بالعكس لسه العتمة بتدوزن معى
حسب اللي ساكن أضلعي
باظهر لكم
وبابين
...

الشق شقشق ضل تحت العين
والعين بتغرب كل يوم وتغيب
مش كنا واحد ليه بقينا اتنين
ولفين وصلنا ف لعبة التعذيب
..
الحزن ماشي ف سكته ع الروح
أيام بترمح والسنين بتروح
انا وانت سيبنا العند باب مفتوح
وبقينا ندخل زي أي غريب
...
ساكناني ولا السكنه مش موضوع
وإزاي نلاقي الراحة لو هتجوع
ف قلوبنا ورده لضحكتين وشموع
وتسيبنا نشرب صمتنا مشاريب

قعمز
..
اسند ضلوعك ع الحجر
انفض تيابك م القلق واضحك
لو لسه فيه باقي م الصبر ف عروقك
وان كان مفيش
..
انضر شروق الشمس
..
واتدفى
..
لفة خلاف لفة
الجرح بيعاود
بياخدله وقت ووقت بيسيبك
تعدل ما بين القعده وسط الناس
والقعدة فرداني
...
والبنت ..
بنت الطيبة والعفاريت
مقدرش عقلك يوزن الأفعال
فيه حاجة قايلة بإنها منهم
وحجات بتثبت إنها
منك
بتكش لما تشوفها وحديها
و تضمها
بعنيك
وتخاف تصحّي الرقه وسط القلب
ف بتمشي يم البحر
وتقعمز

الذكريات الميته..........هادرة
والضحكة طعنه بس مش غادرة
واللي بيقتل فيك ويجرحك بشويش
المفردات لو تيجي مش قادرة
..
تغسل حضورك ف الوشوش والروح
أو ترسمك وسط العتامة وضوح
من غيرها

عجزت .. أم ..عجزوك ؟!
ربطوك ..وبيحجزوك ؟!
م الليلة ملعون ابوك
يا قلب لو
تشتاق

أنا باتخنق .. معلش .. سامحوني
زودت ف عيار الكأبة شويتين
ودخلت من غير إحم
علي قلبكم
دوغري
..
رصف الشجن مغري
والوحدة وسط الناس بتبدل التعبير
وتخلي لو
..
صدمت رؤاي هريرة حمقاء
..
موضوع مالوش تأخير

انا باعتذر لو مش هكمل
الجمال بطل يجمل
م الغباوة الروح تحمل
قلب ...فوق
الاحتمال

لم أحلامك وعاود
القلق خش المراود
كحلها بطل يهاود
ضربة الدنيا
لضلوعك
...

بكفايه رغي ورط
سمع الحبايب - يا قزين - اتبط
هيفيد بإيه العوم والبحر لسه غويط
ومافيش ف أخره
كما العوايد
شط

هتعدي
وتسيب خدوش عادية
مش هتوصل يعني لبداية الخطورة
ستة وتلاتين سنه وكام شرطة
قادرين
يعدوا لك مطبات الحياة
ويوصلوك للبر
مش مكسور
وارد يغيب النور
والعتمة تاخد سكتك وتسيب
كام حفرة مش واضحه
وارد همومك تقلب الصفحة
وتحط خط عليك
..
متخافش
غمي عنيك
وإدخل بعزم الحلم ف ضلوعك
وإرسم بناتك
بس
مش أكتر
..
الفرح هيمطر
وتعيشها من تاني

طب كهربوه القلب يمكن يعترف
إن البساطة طريق ف أخره بننحرف
هتحط أزيد ع الميزان هتطب جار الطين
وتعيش ف أحلا يومين
ووارد م المعايش
تنجرف

مضروب
وباضحك عادي وبكمل
فيه عرجه خافية ع البشر ف الروح
بتبان ف وقت الطبطبة والشوف

صدى الكلام

صدّى الكلام
والمعنى عشش فوق حيوطه العنكبوت
النكتة ..والافيه
فقدوا الشعور
والطعم
...
يبقى انت يابن الناس محتاج لحبة دعم

وكإنه شتل ووسط روحنا إنغرس
مظاهرش ..لكن..جدره وسط النفس

وكإنه شتل ووسط روحنا إنغرس
مظاهرش ..لكن..جدره وسط النفس
إهتز لما نسينا ليلنا ...وغفى
وإشتد لما ف حضن خوفنا أنغمس

...

فيه عرجة خافية عن البشر ف الروح
بتطل لما الفضفضة بتزيد
ونا إيد بتمسك إيد
علشان متكتبشي
..
وبرغم هذا بينفجر ياما
...
دوامه ولا الدوخه من جواي
وحدي ف طريقي ولا حد معاي
وفاكرني صوتي ولا كان نساي
وقت اما تهجم خنقتي
وتزوم
..
الزوم بيهدم كل صورة وحلم

مفرداتك هادية والعالم سريع