فضفض ياكبير ..الى م عطية شواش

فضفض وقول يا كبير


فضفض وقول يا كبير
دا سكاتنا باعنا بلاش

من عاش سنينه هوان
لكأنّ ولا يوم عـــاش

واللى يخاف م العلـل
ما يفارق الإنعــــاش

قول واحكي ع المهزلة
يا عـــــم يا شــــوّاش
..........

فَصّل هـــدوم الوطن
بمازروة الفهمـــــان

واركن مقص الألــق
وخيوط هاريها زمان

يمكن يليق ع الوطن
توبه اللى من ايــدك

وساعة القبح فينــــا
تبطّّـــــل الـــدوران
.......

وطنك غريق يا جدع
والاسم عبارة

و "يريد أن ينقض"
وكنيته عمارة

ولّع بنا وماشيين
في القطر بنهلل

على جول يهز الشباك
لاجله تقوم غـــارة
........

باركولنا بقي ع الغاز
رح نشتريه تاني

خلاص مفيش ألغاز
ولا ضلمة ح نعاني

باركو.. لنا ع الســد
هما الى رح يبنوه

واللى حيعطش هتوه
يشرب من احزاني
........

أنا آية ف "الرمسنة"
وبحب كل "جمال"

واشكر ف "عز" البلا
"وعزمى " هـد جبال

وعندي 6 احصنــــه
وقت اللزوم خيــــال

واسمع واطيع بالقوى
لو قالوا صوم شوَّال
..........

نص الحياة ف طابور
علشا رغيف العيش

والنص بابني فسور
أو دِروة فيها أعيش

أنا اللى كات خطوتى
بتخضر الفدادين

قمحي بقي بالدين
ورزقي ع الكورنيش

عاطف عاشور