فضفض .....

بامبى يا عم جاهين
والكرواسو من وقتها مخلصش م التموين
الصحة بومب وعال
وبقينا أبعد م الخيال .. بخيال
كبروا العيال
والورد دمه مغرق الخدين
..
بامبى يا عم صلاح

كنا صغيرين قوي
واغبيا
وبنستخبي ف أي ضحكة تخش أحلامنا
وكبرنا بعد العمر ما اتدور
والضحك
شاهد ملك - لكن - علي استسلامنا

برد العروق بطل يخاف
الضحك علي قد الكفاف
وعنيكي أشبه بإنعطاف
علي بحر شوك
..
وبقول لروحي ..زمان قوي
مش كانوا دول
بيغيروك

وكل ما تكبر البنانيت
بيكبر جنّهم في البيت
وزوجتى الطيبة بتدوب
كما التلجاية وسط الزيت
..

-...ايه اللي عاجبك ف الوطن علشان تحبه ؟!!
..
* ..كراريس ف ذكري ملخبطة جواها نجمة
..
- .. طب ناوي توصل بعد تكتيفك ...لحاجة ؟!!
..
* .. معرفش ..لكن ..لسه فيه ف العمر هجمه
..
بنانيتي وارد يكبروا ويردوا روحي
وأعرف أداوى

رأيت ...
فيما يرى المحزون

رأيت
فيما يرى ....المحزون
إن الوجع خفف من المضمون
والشمس ضحكت بعد ما اصطبحت
بوشوش سعادة إدتها شوب لمون
..

هتهج لوين !؟
والدنيا يدوبك متر ف متر
بلبوصة الضحكة ومكشوفة
وعروقك تحت الجلد
مفيش
..

هتهج لوين !؟
والدنيا يدوبك متر ف متر
بلبوصة الضحكة ومكشوفة
وعروقك تحت الجلد
مفيش
..
إدهن ورنيش
وإتهد مكان مايقول العيش
..

تفتكري ممكن يعني لو حبيت أقولك شعر أخضرألقي فيه في الروح حكايه توصل المعني
محصورة أوجاعنا
بين إحتياجك
والمافيش
العشق ممكن - بعد إختصار المعطيات - يقدر يعيش
ونا وانت جيش
سلم سلاحه
للقمتين
بايتين
..

بترش الغله لتفاعيلي
وبتسقي الصورة وبتجيلي
وتمللي بتبدأ تأويلي
قبل الحواديت
البنت المجنونة
حقيقي
ف غيابها الدنيا بتتخلبط
والليل ع الكوكب
بيخبط
ويزور البيت

مفضلش منك أزمة
ووصلت للذروة ولا موصلتش
روحك بقع ف تياب جنون الوقت
والأرض بنت ..ال... مافيش
متعلقة ف كرانيش
سيادة الحزن
..
وست الحسن ..
يوم ورا يوم ماشي الجزام ياكل في جتتها
وبيضحك المتاعيس
وبيعزفوا ..
بإحباط
..
ايه ياخد الريح م العياط
..
دا مافيش بلاط ف القبر ولا واي فاي
ــــــــــ
لسه الاشارة ضعيفة
والخلق لابسة الدنيا بالتخاريف
......
ـــــــــــــ
انا لسه روحى مجاتش م الاخبار
فيه حاجة سقطت مني ومرجعتش

متكرمشة الشبابيك
والشمس لسه مجاتش من اخر طلوع
- اللي انت مش فاكره -
الخلق.. كل ..ف بعض ..جيب ..مفروش
الضحك أغرب رد فعل
عبيط
علي كل حاجة محيرة التفاسير
..
والمعطيات بتقول
..
ولا مبتقولشي
..
كل الحجات الحاصلة موصولة
وهتحضن المخاليق

انا لسه روحى مجاتش م الاخبار
فيه حاجة وقعت مني ومرجعتش
تفتكري ممكن بعدها ...أحيا !؟
أحضن بناتي بجد وألاعبهم
وأعمل بوّشي كرمشات
وأضحك
...
ونا لسه روحي مغرقة الأوضة
..
مبقتش ف الروضة
والليلة أمسخ نكتة قولتيها
وضحكت قد القلب ما اتفطر
..
الحزن بيمطر
..
والشماسى ف ايدي مضروبة

يا عم
..
مش كنت اتأخرت شوية *
ومرمتش عيونك يم البحر
وسيبت اللقطة تفوت
..
انا كنت بموت وقتيها يدوبك مرة وحيدة
ومن بعديها
...
باعيش
..
في الموتة كتير
..
لو كنت اتأخرت شوية
صوت العصافير
والناس
مكانوش دلوقت اتحطوا ف أبعد درج ف مخ عقيم
..
ـــــــــــــ
*كنت بغرق في البحر وعمي طلعني