عارفة يا سارة .. عايزة احكى لك

وداد الهوارى كتب:: عارفة ياسارة

من يوم الأربعاء الموافق 16/12/2009 كانت فيه حاجات جميلة بتحصل
معايا رغم إن الظواهر كلها تحدثنى بالعكس .
كنت مريضة لدرجة فظيعة يوم الأربعاء ده وما قبله لدرجة إنى مش قادرة أتحرك وأمشى فى البيت .. والتكريم كان الخميس و المفروض أسافر إسكندرية يوم الأربعاء .. ما اقدرتش .. سافرت الخميس بقوة الله ..
الخميس كان الشتا .. عامل عمايله ..

قولت : بس يا بت ياوده ولا شاعر ح يحضر !
عارفة ياسارة .. المكان كأنى باشوفه لأول مَرة الشعراء والضيوف ملوا
المكان من إسكندرية والقاهرة والبحيرة وأماكن كتيرة .. فرحت جداً بيهم .
والأجمل ياسارة إنها كانت ليلة السنة الهجرية الجديدة يعنى خير من كله
وكمان بعدها كان يوم ميلادى .
خلصت الأمسية وروحنا الساعة تلاتة بالليل ..
ويوم الجمعة بعد الصلاة .. لاقيت هجوم عند أختى .. أخوانى وأبناء أخوانى
والأحفاد حوالى سبعة أحفاد بس جنون .. بيحتفلوا بيوم ميلادى بعد المغرب
قبل ميعاده بيوم لأنى قولت : ح أسافر القاهرة السبت !
عارفة يا سارة ..
العيال مطَّلعين أغنية جديدة لأعياد الميلاد هجموا بيها علىَّ كانوا
ح يموتونى لأنى من الضحك وقعت على أقرب كنبة وهَّم حاصرونى .. تخَّيلى
عارفة الأغنية بتقول إيه ( كان يوم إسود .. يوم ما جيت ..
بابا ، وماما .. سايوا الـــبيت ) على لحن أغنية
سنة حلوة ياجميل !!!!!!!!!! ومن وحى ما يحدث فى مجتمعنا ..طبعاً
بس كان يوم رائع لأنى أحتفلت بكل هذه المناسبات مع أسرتى الحبيبة
ومعرفش ليه صمم أخى أن يحتفل بى مرة أخرى فى بيته بالعجمى وكان
يوماً جميلاً أيضاً . ثم عدت إلى القاهرة .
عارفة يا سارة ..
بيتهيألى إن إحنا بقينا بنتلكك علشان نفرح شوية
ياااااااااااه .. ده الفرح بقى عزيز جداً

سارة الحبيبة أتمنى لك ولأسرتك الفرح الدائم من القلب

دمت بخير وإبداع حبيبتى

وداد الهــــــــــــوارى

أولاً أنا حقاً أسفة علي التأخير
ثانياً وحشتيني جداً جداً
أنتِ عامله أيه دلوقتي ؟
يارب تكوني بخير
و بصحة و سعاده
الفرحه غالية جداً
ونتمني أي شي يفرحنا
حتي لو لدقائق
أنا سعيدة لاجلك
و أتمني لكِ الابتسامة
الدائمة

Very Happy

وداد الهوارى كتب:: عارفة يا سارة

أنا روحت إسكندرية يوم الخميس لحضور تكريم الأستاذ /سيد الخشاب

رائد ندوة النادى المصرى السكندرى .

الأستاذ سيد الخشاب زجَّال كبير وإنسان خلوق وطيب وهو من أساتذتى الكبار

الذين أعتز بهم .

يوم الجمعة .. زرت مقام سيدى بشر وصليت العصر به ثم قمت بزيارة أمى

وأخى .. لأقراْ لهم بعضا من آيات القرآن الكريم وأدعو لهم جميعاً

ثـــــــــم ..

نظرت إلى البحــــــــر .. ووجدتنى أعـــــــــــبَّر إليه الشـــــــارع

كالمسحـــــــــورة .. نفســــــــى أمــــــــــشى على الشاطىْ حافية القدمين

خاصة إن الشمس رائعة والجو جميل والناس قاعدة على الشاطىء ..

ح أنزل .... لا أحمل سوى المصحف ومنديل ورق .. داخل المصحف

ورقة مكتوب فيها دعاء بس.

أول شاطىء ، تانى شاطىْ مميَّز يعنى لازم كان يبقى معايا فلوس علشان

أدخله بعد ما كان حُر وإحنا أحرار ندخله فى أى وقت .. أصبح فيه

شــــــــواطىء للى معـــــــاه فلوس وشـــــــــواطىء للى مش معــــاه

طبعاً علشان كل واحــــــــــد يعرف حدوده ..

بيتنا مش بعيد عن الشاطىء وعشان كــده ماخذتش معايا غير الضرورى

المهم لاقيت شاطىء مجــــــــانى .. والله مِـــــــــش وحـــــــش قوى

جريت على المية ... قلعت حذائى ووضعت المصحف تحت إبطى وبدأت

المشــــــى .. أغرانى البحر تعمقت قليلاً وأنا أمشى .. فجأة .. موجـــــة

عالية .. جرى لبره .. يسقط الحذاء .. تأخذه الموجة .. جزراً

أحاول الإمساك بالمصحف تقع منه الورقة المكتوب فيها الدعاء وتسبح

فوق الماء .. أناديها لا تذهبى .. تســــــــبح .. تأتى موجة أخرى ..

تقترب .. أدخل .. فى البحر أمشى .. ألحق بها وهى سابحة .. أمسك

بها فرحة .. كان إحساسى .. تقبل الله دعائى .. خرجت من الماء

الذى كان يغمرنى حتى صدرى .. أضحك .. أضحك .. كطفل عمل

عملة تغيظ الكبار ...

لمَّا دخلت البيت ــ ورأتنى أختى على هذا الحـــــــــال سألت :

- روحتى البحر

قولت وأنا أضحك : آآآآآآآآآآآآآآآآآآآه

قالت : مجــــــــــنونة يا ودَّة !!

طب أعمل إيه يا ســــــــارة .. باحب البحــــــــر
إلى اللقاء حبيبتى سارة

وداد الهـــــــــــــوارى

ههههههههههههههه
الله عليكِ
والله رائعة جداً
جميل جداً يا غالية
كان نفسي أكون معكِ
في هذه اللحظه الرائعة
أنا أيضأ أحب البحر جداً
و أهم شي أمساك المصحف و الدعاء
و البحر شي رائع فيه سحر
يجذب اليه الناس
فعلاً كان نفسي أكون موجوده

Very Happy

الشاعرة عزة الزرقانى كتب:: بتحبى البحر ياوده

وكمان البحربيحبك

عشان أنتِ كما الورده

شذها عبير صحيح شارده

لكن ف الخير

وكلمة حق كمان وارده

ضرورى ولازم تقوليها

ويفضل كل ما فيكى

نيران حاميه ماهش بارده

لحد الحق مايجيكى يطفيها

ساعتها تكونى اكيد راضيه

الله عليكِ
شاعرة رائعة حقاَ
عندك حق في كل كلمة
شكراً لكِ أيتها الرائعة
Very Happy

وداد الهوارى كتب:

منه الله كتب:

انتى جميله اوى يا استاذة وداد

إنت اللى قمــــــــــــر يا منة .. نفـــــــــسى أعـــــــرَّفك على

ســـــــــــارة صـاحبتى .. ونعمـــــــــل شِــــــــلة صغـــــــننة

نحكى عن متاعبنا وأشياء بتسعدنا .. ولو صغيرة .

بس إنتِ عارفــــــــــة اليومين دول فــــــــيه إمتحانات .. وســــارة

بتذاكـــــــر .. عيزاكى تدعى لها زى ما أنا بادعى لها ولكل أحبابنا

اللى عندهم أمتحانات .. ربنا يوفقهم .

صاحبتى سارة رقيقة خالص وذكية جداً .. بكرة تعرفيها .

وح تبقى صاحبتى وصاحبتها .. بس دايما إبقى تعالى نوَّرى

صفحتنا .. أشكرك يا منة

و .. إلى اللقاء

وداد الهــــــــــوارى

شكراً لكِ يا غالية
عي هذا الكلام الرقيق
و أهلاً وسهلاً يا منه
في هذه الشلة الصغيرة
و أدعو لي بالنجاح و التوفيق

Very Happy

وداد الهوارى كتب:: عارفـــــــــــة يا ســــــــارة ..

كنت عايزة أتكلم مع مصر .. بينى وبينها
( مع نفسى ) فى الركن الهــــــادى .. لكن حسيت كأنك
معايا .. وأنا باحكى معاها وأقول لها اللى فــــ قلبى ..
فــ جيت أحكى معاها عندك وفــى صفحتنا .. عارفة يا سارة
لأنى حسيت كأنك عايزة تقولى لها نفس الكلام .. مع الفارق
فى العمر والأحداث بينى وبينك !

ما تزعليـــــــش

تلات مرات فــــ حياتى أحسست أنك أبنتى أو أختى الصغيرة التى

تحتاج الأمــــان والإحتــــواء والبكاء على صدرى .

المرة الأولى فى سنة 67 .. ورغمر صغر سنى وقتهـــــــــا .

كنت أحس أنك أبنتى

التى تبكى فوق كتفى ، والثانية يوم أن مات عبد الناصر .. جمال

والثالثة .. حين شعرت أنك تحولت إلى كيان بشرى يكتم غيظه وألمـه
رغم قوته .. يحتاجنى ..

رأيتك أبنتى .. أختى الصغيرة المتألمــــــة .. لنكران الجميل .. للقسوة

المقابلة لحنانك وعطفك وإحتوائك لهم .

كنت أريد أن أضمك إلى صدرى أقول لك .. ما تزعليش منهم ..

إنت أكبر منهم .. مش بإيدهم .. فيه حـدَّ عايز يفرق بينك وبينهم

عايزة أكفكف دموعك .. أواسيكِ .. أقول لك .. إنت فاهمة اللى بيحصل

هُم مِــش فاهمين .. غموا عينيهم .. غشـــــــوهم .. الموضوع أكبر

من ماتــــش كــــــــورة .. الموضوع والقضية هى وطننا كله .

صعب علىَّ غضبك .. وإحجامك أنك تاخدى تار علمك اللى بجهلهم

أهانوه .. بتقولى أخواتى .
حسيت إن دموعك محبوسة وقلبك بيغلي .. وزعلانه منهم قوى
وأنا ح أموت عشانك .

طول عمـــــــرى باحس بيكِ أمى .. وطنى .. المسئولة تشيلى همى

المرة دى حاسة إنك محتاجة أنى أكون أمك .. أطبطب عليك وأقول لك

أصبرى عليهم .. وعلى اللى مِش فاهمين وبيهدَّوا فيكِ .......

برَّه .. ومن جــــــوَّاكِ من منتفعين ، وسماسرة وكدابين زفة ،

ومدَّعين

حبك بشعارات وهمية ، وقتـــَّالين لأولادك ، ومتسلقين ،

وهـدَّامين لبنيانك

وبياعين لثرواتك لمصالحهم الخاصة .. ومرتشين ، وناهبين أموالك ..

ما تزعليــــــــــش

وداد الهـــــــــــــــوارى

لا يوجد كلام اقدرأن أقوله
بعد هذا الكلام
لقد جعلتني أبكي
هذا الكلام حرك الكثير من العواطف
بداخلي شكراً لكِ
و أتمني أن أظل أبنتك
ودائماً ستظل في قلبي
Neutral

سلسبيل كتب:: عارفة ياسارة
ماما وداد دي اجمل حد عرفته ف حياتي
اول مرة شفتها ..شدتني نظرة عنيها
فيهم حنان وحب وعطف
مش هقدر اوصفه لازم تشوفيه بنفسك وتحسيه

رغم اني كنت مجرد واحدة من عشرات الطلبة والطالبات
اللي حضروا الندوة
الا اني حسيت يومها ان في حاجة ربطتني بيها
يمكن الحنان اللي ف عنيها ويمكن حاجة تانية مش عارفة
المهم
اللقاء التالي كان بعدها بعدة شهور
يومها حسيت انها امي واني اتحرمت منها سنين طوال
ونفسي زي افلام السينما اجري عليها واحضنها
واللي كان حقيقة مش فيلم وكان اغرب واجمل من كل الافلام
اني مجرد ما جت عيني ف عينها لقيتها فتحالي حضنها وفاردة اديها وبتضمني
ودا طبعا مكنش ليا لوحدي لانها دايما فتحة حضنها لكل الناس
ونهر حنانها يروي كل البشر ويفيض
ومن يومها بقت بالنسبالي ماما وداد

يمكن لان ولادها وبناتها كتير متكنش فاكراني
بس هحاول افكرها بيا

يوم الاثنين 14 ديسمبر 2009
ماما كانت موجودة ف ندوة ف كلية حقوق جامعة القاهرة
وكان معاها الاستاذة وفاء الطيب والاستاذ يحيى ذكريا
وخدت رأيها ف رباعية كتبتها

حبيت كتير لكني عمري م انجرحت
على قد ما حبيت على قد ما اتسامحت
لو كات جراحي تمن دوا قلب الحبيب
يبقى على قلبي يا جرحي ما انحسبت

وبعدها غنيت غنوة اسمها ( حبيبي يا اله الكون )
يارب تكوني افتكرتيني يا ماما
بنتك فاطمة

سامحوني لوطولت عليكم
عارفة يا سارة
صفحات موضعك ده اجمل فرصة تحققلي حلمي
ان افتح قلبي واحكي ببساط كل اللي فيه
يا ريت تقبلوني صديقة معاكم

عندك حق
لقد شوفتها أنا أيضاً
هي فعلاً ماما وداد
أتمني المزيد من التواصل معكِ
أيتها الأخت الجميله
وأهلاً وسهلاً بكِ
Smile

منه الله خليفه كتب:: انا حبيت سارة من حبك ليه على فكرة يا سارة انا ما ليش اخوات بنات
واخترت ماما وداد تكون صحبتى وهكون سعيدة لو خالتينى اخت ليك
وربنا يوفقك فى الامتحانات يارب انتى وكل الطلبه
وشكرا ليكى يا صحبتى انك سمحتيلى اشترك معاكم فى الحوار

شكراً لكِ يا منه
طبعاً أنتِ أختي
أتمني وجودك بالطبع

Surprised

الف مليون مبروك علي التكريم
و أنا سعيدة بهذه
الاسرة الصغيرة ولكنها
أسرة رائعة جداً
أنا في غاية السعادة
Smile

مازن الجندى كتب:

شكراً لك يا مازن
علي مرورك الكريم
Very Happy

طولتي الغيبة يا سارة بجد وحشتيني
على العموم حمد الله على السلامة
من قلبي بدعيلك وللكل بالنجاح والتوفيق
ويسدد خطانا ف الخير ويفرش طريقنا بالورود
آمين يا رب العالمين alien

سلام كبير جدا للعيلة الجميلة Shocked

سلسبيل كتب:: طولتي الغيبة يا سارة بجد وحشتيني
على العموم حمد الله على السلامة
من قلبي بدعيلك وللكل بالنجاح والتوفيق
ويسدد خطانا ف الخير ويفرش طريقنا بالورود
آمين يا رب العالمين

سلام كبير جدا للعيلة الجميلة

أنا حقاً أسفة علي الغياب
أنتِ أيضاً وحشتيني جداً
آمين يارب العالمين
شكراً لكِ أيتها
الاخت الغالية علي قلبي
Very Happy

عارفة يا ســــــارة عايزة أحكى لك

تعالى يا سارة ونادى على طنط مها ، و طنط عزة الزرقانى ،
وأنا ح أنادى سلسبيل ، وصدفة ، ومنة وبقية أخواتك ومازن معانا
عايزة أقول لكم وللمنتدى والناس كلها .. والبحر والشجر وحتى رمل مصرنا الحبيبة أنا باحبكم قووووووى كل سنة وإنتم طيبين .

النهاردة يوم للحب ..
بس يا ســـــــارة أنا عنـــــــــدى فيه مشكلة .. تصــــــــورى فيه تلاتة من أسرتى ظابطين عيد ميلادهم على اليوم ده .. إتفضلى
زوجى يوم 2/13 - أختى الأصغر منى 2/14
إبن أخى 2/14

يعــــــــنى تلاتة عايزين هــــــــدايا طبعا .. قـولى لى أعمل إيه ؟!!!!!
وطبعاً إنتى عارفة إحنا فى نصف الشهر .. يعنى ولا أوله ! ولا آخره !

بـــــــس أنا جات لى فكرة ........ وردة
أولا جميلة ، معـــــبرة ، ومش ......................
وعمو اللى هو زوجى ديماً يقول لى .. الوردة تعبير عن الحب

خلاص .. أنا ح أعبَّر عن حبى لهم بوردة .. بس هههههههههههههه

شوفتى يا ســـــــارة أنا كتبت إيه الصبح :

الحجر الغاضب بالكره الذى قذفتنى به .. غمســـــــته فى ماءٍ نقـــــــى
هـمـست له ، وضعتـــــــه على الأرض ، فـــ طـــــرح حـــــبا للناس !

وداد الهــــــــــــوارى

كل سنة وكل شهر وكل يوم وكل الناس ف كل الدنيا طيبين
وبخيروسعادة وحب وامان وسلام

عارفة يا ماما
صحيح عيد ميلادي لسة بدري عليه
لكن كنت مستنية منك انهاردة هدية
وجبتيلي هدية اكتر من اللي كنت بحلم بيها
لما اعرف ان ليا مكان صغير ف القلب الكبير
ولما تنادي عليا بنفسك وتجمعي العيلة
علشان تقوليلنا بحبكم قوووووووووي
دا اهم عندي واغلى من كل هدايا الدنيا

على فكرة انا رأيي من رأي عمو
الوردة اجمل هدية ممكن تعبر عن الحب
لانها مش مجرد هدية
هي اكتر مرسال تأتمنيه على احساسك ويقدر يوصله
علشان كدة انا بعتالك المرسال ده
وانتي اكيد عارفة انا بعتالك معاه ايه
اصل مفيش كلام ف الدنيا ممكن يوصف احساسي بيكي
Very Happy

عارفة يا سارة
اتعودت اني ف يوم الحب لو مش فيه حد جابلي هدية
اجيب هدية لنفسي
متهيألي لازم احب نفسي علشان اقدر احب الناس
بجد مش انانية بس هو احساس غريب بيجيني
خلينا نطلب من ماما تفسره لينا
يعني انهاردة روحت لحقت معرض الكتاب على آخر يوم
علشان ادور على ديوان لماما وداد
واهديه لنفسي
وتعبت من اللف ومش لقيت
واتصلت بماما علشان تقولي الاقيه فين ومش ردت عليا
ورجعت البيت تعبانة وزعلانة علشان الاقي اجمل هدية من ماما
عرفت ان ربنا مش بيضيع تعب حد

الغالية المبدعة / سلسبيل

سعيدة قووووى بيكِ وبإنضمامك للأسرة الصغيَّرة اللى إتكونت بيكم
يا أحلى شباب وبنات قمرات فى الدنيا ( على فكرة أنا با احب البنات أكتر شوية )
و مِش لإنى صعيدية ممكن أتحيَّز للولاد .. زى عواجيز بلادنا !
تعالى يا سارة .. سلسبيل راحت معرض الكتاب وحاولت تلاقى ديوان
من دواوينى .. ما لقيتش !
عارفة يا سلسبيل : أنا ما روحتش معرض الكتاب غير يوم واحد بس
كان شعراء الأسكندرية موجودين كان يوم 2/7 وكان أستاذ/ عادل عوض
متألق فى اليوم ده .
روحت أشوف دواوينى علشان أشترى .. لإهداء بعض الأصدقاء اللى
طلبوا منى إقتنائهم .. تصورى ما لاقيتش برضه ، سألت المسئول فى صالة
العرض الخاص بهيئة الكتاب قال : أنهم يحضرون من الهيئة دفعة كبيرة من
الكتب والدواوين فإذا بيعت لا يأتون بغيرها لأخر المعرض .
ولقد بحثت عن دواوين لشعراء زملاء ولم أجد أيضاً .. لكن ما فيش مشكلة
حين نلتقى سأهدى لك ديوان أو ربما أكثر لأننى سأحصل عليهم من مكتبة الهيئة قريباً . ويشرفنى ويسعدنى إهدائهم لك لقراءتهم .
سعيدة بشعورك هذا جداً لكن هناك سر سأفشيه لكم أحبابى
تعالى ياسارة فيه كلمة سر ..
عارفين أن كلمة ماما دى عاملة زى مفعول السحر عند أى أنثى تجعلها
فى ثانية تشعر بخفة كأنها تطير وأن قدميها لا تلامس الأرض
لأنها بتتولد وعندها غريزة الأمومة سواء أنجبت أو لم تنجب .....
كلمة رائعة فيها كل معانى الحياة والحب ...
ورغم أننى قمت بتربية عشرة أطفال حتى صاروا رجالاً وزوجات
إلا أننى رفضت أن ينادونى بهذا الأسم المحبب .. ليه ؟
أولاً : لأن ماما للأبن أو الأبنة .. واحدة والوحيدة التى لها الحق من وجهة
نظرى .. ألا نسلبها حقها فى كلمة تعنى البنوة ، والأمومة
ثانياً : وهذا شعور شخصى .. إذا نادانى أحد بها أشعر وكأننى أغتصب حق
إمرأة أخرى .. كانت بين الحياة والموت وهى تنجب هذا الأبن أو
الإبنة .. فـــ أخجل من ربى .
عارفين يا بنات .. منذ أن ماتت أمى لم أناد أحداً بأمى سوى الصغيرات
لأننى أحب أمى كثيراً . وأقولها للبنات الصغيرات من باب التدليل .
عموماً لقد تذكرت هذا حباً فى أمى .. وإنتوا عارفين النهاردة
يوم الحـــــــــــــــــــــب

صديقتكم : وداد الهــــــــــــوارى

ماما وداد أحب إنانه لقلبى واللى عملت معايا حاجات هى مش حاسه بيها بس بجد غيرت مجرى حياتى كلها وخلتنى إنسانه جديده
وسعيده إوى إنك ناديتينى فى عيد الحب بجد أحلى هديه فى اليوم ده معلش يا ماما كنت تعبانه تصورى كنت عيانه اوى ومعرفتش البى نداءك
انا كمان كنت مع سلسبيل فى معرض الكتاب وكنت هموت وهلاقي ديوان ليكى بس ملقتش ولفيت لف كتير اوى واتصلنا بيك كتير اوىواتصلنا كمان أ:عاطف الجندى وكان مقفول كان نفسى نسألكوا فين دواوينكم وبالذات يا ماما ديوان الليل سكن أصل بحبه أوى وكان نفسى الاقيه واليوم ده كان الجو حر جدا والشمس جابتلى صداع من كتر اللف فيها والله مايهمنى كل اللف ده بس كان نفسى تكمل فرحتى والاقى دواوينك

يسعدنى يا ماما انى انضم للاسره الجميله دى
وهقولك ياماما على طول عشان ده احساسى لما بشوف اشوفك وابص فى عنيكى ياريت متحرمنيش من احساسى بيكى ده

هتوحشينى يا ماما وكمان نفسى اتعرف على ساره الجميله

صدفه كتب:

ماما وداد أحب إنانه لقلبى واللى عملت معايا حاجات هى مش حاسه بيها بس بجد غيرت مجرى حياتى كلها وخلتنى إنسانه جديده
وسعيده إوى إنك ناديتينى فى عيد الحب بجد أحلى هديه فى اليوم ده معلش يا ماما كنت تعبانه تصورى كنت عيانه اوى ومعرفتش البى نداءك
انا كمان كنت مع سلسبيل فى معرض الكتاب وكنت هموت وهلاقي ديوان ليكى بس ملقتش ولفيت لف كتير اوى واتصلنا بيك كتير اوىواتصلنا كمان أ:عاطف الجندى وكان مقفول كان نفسى نسألكوا فين دواوينكم وبالذات يا ماما ديوان الليل سكن أصل بحبه أوى وكان نفسى الاقيه واليوم ده كان الجو حر جدا والشمس جابتلى صداع من كتر اللف فيها والله مايهمنى كل اللف ده بس كان نفسى تكمل فرحتى والاقى دواوينك

يسعدنى يا ماما انى انضم للاسره الجميله دى
وهقولك ياماما على طول عشان ده احساسى لما بشوف اشوفك وابص فى عنيكى ياريت متحرمنيش من احساسى بيكى ده

هتوحشينى يا ماما وكمان نفسى اتعرف على ساره الجميله

الحبيبة الرائعة أجمل صدفة فـــ حياتى

بالذمة ده إســـــمه كلام .. يا حبيبتى نتقابل وأحضر لك الديوان أو أكثر
من دواوينى لحـــــدَّ عندك .. تتعبى ليه ؟
قريب جداً نعمل ملتقى تعارف بين ســــــــارة وبينك وسلسبيل والبنات الحلوين
وأكون معاكم .. ح أكون سعيدة جداً بده وعلى فكرة أجمل فكرة
إننا نعمل الميعاد ده فى ندوة أستاذ عاطف الجندى .. ونطلب من سارة
أنها تقابلنا فيها ونتقابل كلنا .. إيه رأيك ؟ وإن شاء الله أحضر معايا الليل سكن
أتفقنا ؟!
طلباتك أوامر يا جميل !
حفظك الله من كل سوء
وأنا كمان .. بحبكم قوى
وداد الهـــــــــــــــوارى

موضوع: عارفه ياسارة الأحد فبراير 21, 2010 11:40 pm

جميله اوى مظاهرة الحب البنوتى ليكى يا استاذه وداد
شفت فيها أد ايه البنات بيحبوكى وينادوكى بأغلى أسم فى الدنيا
لأن قلبك معطاء عليهن وعليهم ايضاً لأنى شفت ليكى تلامذة وابناء شباب وصبيان كلهم بيتمنو منك كلمة رضا أو لمسة حنان من قلبك الجميل ده
انا مش مندهشة منهم انا مندهشة منك انتى وسعيدة فى نفس الوقت انى بشوف ده بعيونى يبدو لأ دا أكيد
ربنا سبحانه وتعالى عطاكى جاذبية ولمعه فى عيونك وحنان فى بسمتك بتشد الولاد دول ليكى
واستعدادك لمساعدتهم وتزييل الصعب عليهم زى ما شفت ردك على الطالبة المجتهدة صدفه- دلوقتى
الله عليكى وربنا يزيدك من حب الناس اللى فى القاهرة واللى فى اسكندرية واللى فى الصعيد كمان بس أرجوكى متزعليش منى انى بكتب رأيي ده لانه مش كفايه اقولو لكى بينى وبينك
لازم الناس تعرف إن الحب مش كلام مرصوص لأ الحب فعل وانتى الحب كله ياوداد
Very Happy

بســـــــــــم الله الرحمــــــــن الرحـــــــــيم
( اللهـــــــم لا حول ولا قــــوة إلا بك يارب العالمين )

الأستاذة الشاعرة .. مشرفة النثر / وقاء أمين
نورَّت بيتنا .. أقصد صفحتنا ..
تعالى يا سارة ، ياسلسبيل إنتى فين ؟ تعالى هنا يا صدفة .. إيه
يا بنات ؟ ما فيش حاجة نقدمها .. للأستاذة وفاء اللى جاية من أخر الدنيا
مدينة نصر تسلم عليكوا ؟ بسرعة حاجة ساقعة ..
طبعاً إنتى عارفة سارة ، شوفتيها قبل كده القمر دى بنت عاطف الجندى
وهى طالبة ثانوية عامة مجتهدة .. بسم الله ماشاء الله عليها ، وهى
مبدعة ، وفنانة وتعشق الفن التشكيلى ..
وأقدم لك سلسبيل / الأستاذة فاطمة كلية حقوق ...
الفرقة الثالثة / يعنى إن شاء الله وتبقى محامية آد الدنيا فاكرة فيلم الأستاذة/
فاطمـــــــة ؟!
وهى كمان شاعرة جميلة ،ومطربة صاحبة صوت ملائكى وتلحن أيضاً .
والأستاذة صدفة / هبة خريجة حقوق أيضاً .. و تقوم بعمل دبلومة فى
القانون العام ... يعنى أستاذة

وهى كما تعلمين / قاصة .. ناثرة .. وشاعرة جميلة
وزى ما أنتى شايفة كده أخدوا الجمال كله من بنات حــــــوا .
ولسة فيه أصحابى ح أبقى أعرفك بيهم بعدين منهم شباب أخوانهم ..

شــــــــوفى يا وفاء .. اللى إنتى فاكرة إن إحنا بنعلمهَّم .. صدقينى
همَّ كمان بيعلمونا وبيدونا الحب يصحى قلوبنا بعد ما طواحين الحياة
هرستها .. أنا قابلت الشباب ده مبدع ، متعلم ، فاهــــــــم
لما أتكلم معاهم وأرجــع بعمرى لمَّا كنت فى عمرهم ألاقيهم همَّ الأفضل
الأوعى والأكثر ثقافة .. وفطنة .. حتى الأمس القريب أعترف أننى ُخدعت
من الأصدقاء .. لم يخطر على بالى أن أقوم بعمل إختبار لصديقة !!!!!
إن كانت تستحق صداقتى من عدمــــــه ..
هــمَّ يفعلون ذلك .. لا يضيعون أوقاتهم لمجرد العاطفة ..
همَّ يفهمون أكثر أن الإنسان عمره أقصر من أن يضيع فى مهاترات
وبالتالى هم يختارون بالعقل والقلب ..

هم إذا أحبوا يحبون بصدق وقناعـــــــة ولا يخدعون .. ولا يسمحون لأحد
بخداعهم ! وفاقد الشــــــــىء لا يعطيه .. هم يعرفون ذلك يشعرونه ..
من لا يملك الحب .. كيف يعطيه ؟
سألتنى سلسبيل وسوف أجيبها تفصيلياً لاحقاً سؤالاً جميلاً : جعلنى أفكر
صحيح الواحـــــد لازم يحب نفسه علشان يقدر يحب الأخرين ؟!
مؤقتاً أقول لها هناك أشكال لحب الإنسان لنفسه ..
الحب .. فى شكل رضا عن النفس تجاه ربه والناس وضميره
الحب الأنانى : الذى تطغى فيه النرجسية والتفخيم للذات حتى ولو لم تستحق
ولكن الأفضل أن لا نكره أنفسنا حتى لا نكره الدنيا والناس
ونحب أنفسنا ولكن فى إعتدال .. والأفضل من كل هذا هو .... الإيثار ..
أن تحب غيرك وتفضله على نفسك .. وهذا منتهى الحب
ومع الفارق فى التشبيه .. حين قال سيدنا عمر للنبى ( أحبك أكثر من نفسى )
وقال رسول الله صلىَّ الله عليه وسلم ( الأن يا عُمـر )
أشكرك على مرورك العطر
وكلماتك الرقيقة .. ولا تندهشى من حبى لهم .
فهم يستحــــــــقون
وداد الهـــــــــــوارى

ازيكم كلكم واحشونى كتير مع انى حسه انى ما حدش فاكرنى
حتى صحبتى اللى اخترتها من المنتدى الشاعرة الكبيرة وداد
شوفتى يا سارة هى بتعرف الاستاذة وفاء عليكم ناستى مع انى اعتبرتى نفسى منكم بس على العموم انا بحبكم كلكم والمنتدى كله كان واحشنى بجد حتى انتى يا صحبتى والله العظيم واحشتينى اوى
يارب كلكم تكونوا بخير وفى احسن حال

منه الله خليفه كتب:

ازيكم كلكم واحشونى كتير مع انى حسه انى ما حدش فاكرنى
حتى صحبتى اللى اخترتها من المنتدى الشاعرة الكبيرة وداد
شوفتى يا سارة هى بتعرف الاستاذة وفاء عليكم ناستى مع انى اعتبرتى نفسى منكم بس على العموم انا بحبكم كلكم والمنتدى كله كان واحشنى بجد حتى انتى يا صحبتى والله العظيم واحشتينى اوى
يارب كلكم تكونوا بخير وفى احسن حال

الشاعرة الرقيقة / مِنة
حمد الله ع السلامة .. أنتى كمان وحشتينا
بس مين قال إحنا نسينا منة ؟ بالعكس لو تصفحت
وقرأت نفس الصفحة ح تلاقيني بناديكى فى يوم الحب
بس طبعاً كنتى مسافرة .. صح ولما رجعتى ما شوفتش تعليقك
على أبداع ولا قصيدة كتبتيها .. أو يمكن أنا ما أخدتش بالى غير
لمـَّا شوفتك هنا مع سارة ، وصدفة وسلسبيل بتكلميهم .
حمد الله ع السلامة ونوَّرت المنتدى يا منِة
وداد الهــــــــوارى

عارفه ياساره

دخلت الموضوع وماكنتش اعرف اد ايه

هو جميل ومشوّق

فالاستاذة وداد زادته بهاءا باسلوبها الجميل والشيق

فى سرد الاحساس

اتمنى ان تقبلونى معكم عضو جديد فى هذه الصحبه الرائعه

استاذه وداد دائما اسعد بقصائدك وتعليقاتك

واتابع اخبارك ودخلت هنا حين قرات اسمك

ووجدت نفسى مستغرقه فى القراءة حتى انتهت اثنتا عشر صفحه دون

ان ادرى والسبب ان رايت هذا الحب الكامن بداخلك

وهالنى هذا الكم من المشاعر المتدفقه

ادام الله حبك وحنانك وابداعك

مروة البسيونى كتب:

عارفه ياساره

دخلت الموضوع وماكنتش اعرف اد ايه

هو جميل ومشوّق

فالاستاذة وداد زادته بهاءا باسلوبها الجميل والشيق

فى سرد الاحساس

اتمنى ان تقبلونى معكم عضو جديد فى هذه الصحبه الرائعه

استاذه وداد دائما اسعد بقصائدك وتعليقاتك

واتابع اخبارك ودخلت هنا حين قرات اسمك

ووجدت نفسى مستغرقه فى القراءة حتى انتهت اثنتا عشر صفحه دون

ان ادرى والسبب ان رايت هذا الحب الكامن بداخلك

وهالنى هذا الكم من المشاعر المتدفقه

ادام الله حبك وحنانك وابداعك

أهـــــــلاً يا مروة
نوَّرت الصفحة .. لو تعرفـى آد إيه سعــيدة بوجودك معانا !
أهلا بيك عضو معانا فى عارفة ياسارة ..
وأكيد ح تكونى سعيدة معانا إن شاء الله .. أنا إتأخرت شوية
فى الردَّ لكن معلش .. إن شاء الله ح أكتب قريب ونبقى ناخد رأى بعض
فى الموضوع وتتعرفى على البنات القمرات هنا ونتكلم مع بعض
فى كل ما يدور من مواضيع تهمنا كبار وشباب وصغيرين .
وتشاركى معنا برأيك لأنه مهم .
دمت بكل خير وحب
وداد الهـــــــــوارى

سعيدة بقبولى عضو جديد فى هذه العائله الصغيرة المحبه

وحقيقى ان هأستنى تواجدكم على هذه الصفحه

بكل الحب والصدق والاخلاص

مع خالص حبى وتقديرى

صديقتكم مروة

الى اللقاء

موضوع: عارفة يا سـارة الأحد أبريل 18, 2010 5:29 pm

عارفة يا سارة عايزة أحكـــى لك ..

حاســــــــــة بحاجة غريبة جداً بتحصل لي اليومين دول .. بس علشــــان

تحســــــــيها معـايا ح أشـــــــــرح لك الموقف والشعــــــــور اللى حســـــــيته !

لـمَّا شاركت فى جامعـــــة القاهرة الشباب فى نشاطهم الثقافي والأدبي ( إتحاد الكتاب )

بالجامعة كنت سعيدة جداً بينهم وبيهم وإقتربت منهم ومن أفكارهم والحمد لله هم كمان

أحسست منهم الحب .

بعد فترة أصبح لى أصدقاء منهم ( فاطمة - هبة - راندة- مرفت - شريف -عفاف

كريم - محمد - سيد)

وغيرهم وإتعلقت بى عفاف جداً جدأ ولو قولت لك أننى رأيتنى فيها حين كنت

شابة ستعجبين .. هذه الشخصية الطيبة داخلياً القوية فى الظاهر عاشقة الشعر

ولا أريد أن أذكر صفات أخرى أحببتها .

ولكنى منذ أسبوع أفاجأ حين غابت عنى وأتصل بها تقول لى :

سأنسحب من سـاحة الأدب .. وإن لم تكونى أنتى ماما وداد وإن لم يكن رقمك

ما رددت على الهاتف .. ولم تذكر الأسباب .. ولم أشأ أن أضغط عليها

فتركتها حتى تريد الحديث .. أرسلت لى برسالة .. ولم أجب .. لابد لها من وقت

فربما تكون على حق .

حين تركت أنا الندوات كانت لى أسبابى والحمد لله خلال مشوارى أعتقد أننى

تركت ما يتذكرنى به الشعر ولكنها فى البداية .. ماذا حدث مع هذه الشاعرة

الواعدة بجمال الشعر وعمقه ؟! لست أدرى . ولكنى حزينة لذلك .

وحشتينى يا سارة وأتمنى لك النجاح من كل قلبى

وداد الهــــــــــــــــوارى

ازيك يا ماما وحشتينى اوى
اللى حصل مع عفاف بيحصلنا كلنا يوم بعد يوم
انا حزينه جدا ياماما على عفاف لانها من الشاعرات المتمكنان جدا وليها مستقبل حلواوى انا شضخصيا بحب شعرها واتعلم منه
بس المشكله ياماما ان الدنيا مبقاش فيها امان يعنى اللى فى وشك بيضحكلك من ورايا يتكلم عليكى
اللى حصل مع عفاف ومعانا كلنا ان احنا حبينا ساحات الادب اوى واعتبرناهم كلهم اصدقاء واحباب واخوات لينا بس المشكلة ان احنا بننخدع اوى فيهم
كل تصرف بيحصل بحسن نية بيشوه بكلام وسؤء نية
لاننا المفروض قبل ماننزل من البيت نركب قناع تانى غير شخصيتنا عشان نعرف نتعامل مع الناس عشان الناس عمرها مابتفهم صح
انا تعبت اوى يا ماما زى ماغيرى واولهم عفاف تعبوا اوى ومش عارفين نعمل ايه
انا لسه معرفش موضوع ان عفاف هتسيب ساحات الادب غير امبارح وده كان فى نفس الوقت اللى انا فيه بفكر فى القرار ده وصدقينى مش انا وعفاف بس ده غيرى كتير ومن ناس متميزييين بجد وحضرتك شوفتيهم بنفسك وعرفتيهم
بجد وحشتينى يا أمى نفسى اشوفك واحكيلك كتيييييييييييييير اوى
وعاوزه اقولك ياساره انا مش ناسياكى ووحشتينى اوى لانى شوفت فيك بنوته جميله اوى فيها حاجات كتير حلوه ياريت تحافظى عليها من الزمن اللى احنا فيه ده
ربنا معاكى واحنا كلنا معاكى

» ناويت احكى قصتنا
» عايزة أتجوز
» عايزة اتجوز...!!!
» إن كنتي عايزه محبتي
» ولسـّه عايزه تفهمي ..؟ .. ضياء الدين البري