("الأخ "عامل فيها شاعر )مساجلة

الفَرق بين البَشرْ..في العقل والتفكيرْ

وكُل وجهة نَظَر..وراها 100 تفسيرْ

نزلت سوق الأدب..أسأل عن الأشعارْ

لقيت هناك العَجَبْ..والعقل تاه واحتارْ

لمّا الغباء إنتَشَرْ..والجَهل بقى صَنعَةْ

ومات ضمير البَشَرْ..بالكدب والسُمعَةْ

كُل اللّي يمسك قَلَمْ..بقى فيلسوف وإمامْ

(كوز المَحبة إتخَرمْ..إدّيلُه بُنط لحام)!!!

وكلام غريب مكتوبْ..مدسوس على الأشعَارْ

ولسان بيحدف طوبْ..ويسَمّـم الأفكـارْ

وياما بُكرة نشوفْ..أحوال ما تعجبناشْ

عشان معانا خَروفْ..محسوب علينا بلاشْ

وكُل يوم بيعيدْ..في كلام غريب مَجهولْ

فرحان أوي وسعيدْ..عشان يوماتي يقولْ

يرحم زمان الأدبْ..والفكرة والأشعَارْ

الله يجازي السَبَبْ..في الفَن لمّا انهَارْ

وكل يوم بيفوتْ..يطلع لسان هلفوتْ

يُصرخ بعلو الصّوتْ..يقلب حياتنا مَرارْ

فينك يابيرم فينْ..إنده عليه ياجاهينْ

يُردّ عـ المجانينْ..ويكَمّل المشوارْ

تسلم عيونك ياغَالي..ويسلم الإحساسْ

إسمحلي أسأل سؤالي..بصدق وبإخلاصْ

مين اللّي قال الكلام..بيمسّ أشعاركْ؟؟!!

داانتّ كلامك نَغَم..يسحر قلوب النّاسْ

خلّي البُساط أحمَدي..سيبك من التكليفْ

ياللّي كلامك نَـدَي..نسمة هوا في الصّيفْ

(أحمد) حبيبي هنا..بيقول كلام موزنْ

والفكرة والمضمونْ..تستاهل التصقيفْ