خواطر عامل على المعاش (عفوا عامل على الهامش)

خواطر عامل على المعاش

(عفوا عامل على الهامش)
[/color]

يا ضَي العين وصلت معاكِ

للسِّتين .. و انا باجري

و شايل ع الكِتاف إسمِك

باشُق بقِوِّتي .. فجري

لِحَد شبابي ما روَّح

وخَد فى سِكِّتُه العافيَة

فقلت امشي على مهلي ..

سِنينى البَاقيَة من عُمري

******

ياضَي العين ..

يوماتي نَفسي باقنِعها

بإنك .. بُكرة حا تجي لي

وإنك .. رافضة نِسياني

وتهميشي أنا و جيلي

و إنك رافضة حد يقول

دا مش عامل و لا مُنتِج

ما انا اللي شقايا علشانِك

.. تعَبنى وهد لي حيلي

و انا إبنك .. وانا نبتِك

و انا اللي كُنت يوم عامِل

******

أنا النخل اللي كان عالي

و كان شامخ و كان طارح

و انا اللي زرعت لك قمحِك

خَبَزت رغِيفِك الصَّابِح

و انا اللي غزلت لك قطنِك

و انا اللي نسجت لك توبِك

و انا اللي شقايا كان أناشيد

بتتغنَّى على درُوبك

تبُصِّي .. تحت رجليكى

وتنسي اللي شِقِي امبارح ؟

دا انا إبنك

******

أنا اللي دُقت طعم المجد

و العِزَّة على إيديكي

و انا اللي رَفَضت اشوف يونيه

بتوب اسوِد مِغطيكِ

و يوم ما ناديتِ ف اكتوبر

علينا .. هِبُّوا يا ولادي

زعقت بعزم مافِيَّا

ياعُمري كُله .. لبِّيكِ

ما انا إبنك

*****

أنا اللي هزِّني ندَاكِ

في ساعة الجَد لبِّيتُه

عَبرت المانع المائي

أنا و جيلي و عدّيتُه

و دُست برجلي ع السَّاتِر

و زلزلتُه.. و هدِّيتُه

و ساح دمِّي عليه أنهار

و سِبتُه هناك ما لمِّيتُه !

ما انا إبنك ..

******

و الِمُّه ليه ؟

ما اسيبُه يجري

يتمايل على الصَّحرا

أحنِّي بيه إيدين سينا

و أروي أرضِها الطاهرة

كفاية عليها سِت سنين

وهى تصارع الغُربة

رويتها بدمِّي عِز الضُّهر

صَبَحِت أرضِها خَضرا

ما انا إبنك ..

******

و لمَّا شبابي ودعني

و كِبر سني تبيعيني؟

و لمَّا ابيَض لون شَعري

و وهَن عضمي بترميني

و لمَّا الشيبة لازمتني

و حنَت ضهري تسيبينى

لِنار أسعار على الهادي

تقلِّبني .. و تشويني

و لُقمِة عيشي تديني

طابور صبَّاحي على فُرنِك !!

و انا من حقِّي اكون مرتاح

و انا فى الشيبة دى ف حُضنِك

خُديني لصِدرك الحَاني

و ضميني .. ودَفِّيني

مانا إبنك ..

و انا نبتِك

و انا اللي كنت يوم

عامل

محمد البسيونى

هذه المساهمه للأشتراك فى الكتاب الجماعى

برجاء نقلها الى هناك

من قبل الادارة

حيث جائت هنا بدون قصد

للقدير محمد البسيونى

أرجو نقلها

دمت بحب

خواطر عامل على المعاش (عفوا عامل على الهامش) 798642

الشاعرة عزة الزرقانى كتب:: هذه المساهمه للأشتراك فى الكتاب الجماعى

برجاء نقلها الى هناك

من قبل الادارة

حيث جائت هنا بدون قصد

للقدير محمد البسيونى

أرجو نقلها

دمت بحب

تنقل للعامية
و تشترك بالكتاب المجمع
إن شاء الله

اخى الحبيب الشاعر الكبير

محمد البسيونى

خالص تمنياتى برواق الحال

لنعود الى المسابقات مرة اخرى

وتمنياتى بالفوز ...

الاب الفاضل والشاعر الكبير أستاذى محمد البسيونى

دائماً متفرد ورائع

وفى كل مرة أقرى لحضرتك

أستفيد بشكل غير عادى

وعذراً للتقصير فى التعليق

يعلم الله قدرك عندنا

أتمنى تكون حضرتك بخير

فى ظل الأحداث الراهنه

وربنا يجيب خير يارب

وألف شكر لهذا الإبداع المتفرد فى حرفك الراقى

عمى محمد البسيونى رائعة من روائعك المبهرة احسستها وعشت فيها كانها رواية مصورة

الأستاذ عادل عوض سند كتب :

اخى الحبيب الشاعر الكبير

محمد البسيونى

خالص تمنياتى برواق الحال

لنعود الى المسابقات مرة اخرى

وتمنياتى بالفوز ... [b]

أخى الحبيب الشاعرالقدير

عادل باشا

نظرا لأن السنترال الخاص بمنطقتنا

حدث به حريق أثناء عمليات التخريب

فقد توقف النت عن العمل طوال هذه

الفتره ولذا أتقدم باعتذارى عن التأخر

فى ردى على سيادتكم وكذلك كل أحبابى فى

المنتدى ,

شاكر فضلك على تعليقك الطيب والمحترم

وهذا ماتعودنا عليه منك أستاذنا القدير

ولا يفوتنى أن أقول لك تمنيت أن ترى هذا

اليوم قبل الرحيل لو تذكر فى تعليق لك

وها قد تحققت أمنيتك ألف مبروك لك ولنا

وولمصر كلها .

أخوك محمد البسيونى

» ع الهامش ......
» عفـــوا !!
» حفل خروجى الى المعاش
» (عفوا سوريا)
» ("الأخ "عامل فيها شاعر )مساجلة