ارجع بقى ( شعر جمال بخيت )

ارجع بقى
وفك حبل المشنقة
وامسح همومنا باللقا
ياجدرنا تحت التراب
يا حلمنا فوق السحاب
يا عمرنا طال العذاب
في الانتظار
رجعوا التتار
لكننا أشواك بتتحدى العطش
وجنود بتتحدى الفرار
نسقط ساعات
لكننا نفضل كبار
نفتح عيون للانبهار
متشوقة
فارجع بقى
وفك حبل المشنقة
وارفع راياتك يا أبى
قريش بتسأل عن نبي
يهديها من بعد العمى
خالد قتل مسيلمة
لكن جنوده الكدابين
عينهم في طابا
يتحدوا فرسان الخطابة
ويلجموهم بالسكوت
في عصر بيروت الحزين
خالد قتل مسيلمة
لكن جنوده الكدابين
بيفتتوا دلتاك بصبر
وبيحفرولى في سينا قبر
وبيركبوا نيلي العنيد
وبيخنقونى في الصعيد
بكلام نكت وبتريقه
فارجع بقى
دا الهزل زاد
والباشا إيده على الزناد
وصدقى بيصلى لفؤاد
وبيحلفوا نرجع عبيد
نتباع فى أسواق الكساد
الهزل زاد
والباشا إيده على الزناد
والسد جوه الفوهة
لو ينسفه تغرق بلادك كلها
وتعود سنين الأوبئة
تسكن ضلوعنا الضيقة
فأرجع بقى
الشمس سكنت كل غرب
حلفت ما ترجع للشروق
من أي شرق
إن لم تكن في الانتظار
انت وسيفك -والتتار تحت القدم-
فأقضى بصوتك على العدم
اعدل موازين الزمان
رتب نجومنا في الفضا
وأكسى وجوهنا بالرضا
بعد الشقى
دي الأمة لسه محتاجاك
والأرض لسه مهيأة
فأرجع بقى

بجد بجد الله ينور ومنتظر مزيدك يا\ااستاذ منير
ارجو تقبل مرورى
اخوك
احمد سعد
شاعر غنائى

أستاذتنا الغالية أميرة الرومانسية الأستاذة أميرة البدري أشكرك على مرورك الجميل الذي أسعدني كثيراً والحقيقة أنتي اللي رائعة ف كل شيء في شعرك وذوقك وأخلاقك .

أخي الحبيب الشاعر الكبير الأستاذ عمرو زتون أشكرك على مرورك الجميل , والحقيقة أنا لما مبلاقيش نفسي قادر أكتب حاجة كويسة , بانتقي أعمال الأساتذة اللي أنا بحبهم في الشعر علشان أفضل متواصل معكم لأني بحبكم ومابحبش أغيب عنكم كتير . لك تحياتي وتقديري .

الأخ الحبيب والشاعر الكبير الأستاذ أحمد سعد أشكرك على مرورك الجميل , والحقيقة الله ينور على جمال بخيت مش عليا أنا . بصراحة الشاعر ده غير عادي .

الاستاذ الشاعر / منير منيب

اشكرك على هذ الحس العالى فى اختيار نص ارجع بقا

للشاعر الرائع جمال بخيت

عاوزة اقولك انى سمعت هذا النص من الاستاذ جمال بخيت

فى ذكرى الوحدة بين مصر وسوريا وقد ايه كنت معجبة جدا بهومستمتعةللغاية ومن وحيه انتجت نص (وكأنها)

انتي اللي لكي الشكر يا أستاذتنا هناء على مرورك الجميل . والحس العالي احنا دايماً بنتعلمه منك .

أستاذي وأخي الأكبر الأستاذ عادل عوض لك الشكر على تعليقك الجميل . أدامك الله لنا .

أستاذتنا الكبيرة وداد أشكرك على مرورك العطر وأشكرك على رأيك فيا . والحقيقة انتي اللي ليكي الفضل في محاولتي انتقاء بعض القصائد للشعراء اللي أنا بحبهم وباعتبرهم المثل الأعلى ليا لأن انتي اللي كنتي سباقة لما نزلتي رباعيات صلاح جاهين ,وأنا إن شاء الله أي عمل حاكون حاسس إنه جيد حانزله في المنتدى للإستفادة . لكي الشكر مرة أخرى .
أخوكي ( منير منيب )