يا موعود بالنيل والضل..(د. معز عمر بخيت)

بتمنى أجيك ..

يا لوحة حب وهيام اهديك

أحلام وقصايد

نخلة بتطلع من واديك

من كل خطاوي الممشي

العابر حد الدنيا هناك راجيك

ما بين الزمن الماخد

من إحساسنا المرهف

وخطاويك

الشوق بتحدى الحزن

الساكن في ماضيك

أمل البسمة الجاية تضوّي

دروبك لحظة وبتغطيك

يا اجمل لمحة رقيقة وسمحة

معاني حنينة بتجي تديك

ضو الضحكة

وشمس الإلفة السكنت فيك..



***

من يوم الغيمة الساكنة فريقنا

اشتكت المطرة لهم الناس..

من يوم الشعلة الوقفت تنده

أهل الحلة الهجرو الغابة

وطق الفاس

والحرقة العاشقة لهيب الفرقة

مواويل باهتة بدون احساس

ومعاني سجينة بتطلع منك

ريد محبوس

في حريق أنفاس

الخوف مرسوم في عيون الشجر

النايم جنبك

عالي جبين مرفوع الراس

وحنينا الكاتم صبرو عليك

مشدود أقواس

الوتر اتضرع في الغنيات

والشوق الطاف دق الأجراس

الصوت الباب الريح والليل

والجرح الصاحي عليهو أساس..

***

مين بس زيك

يا موعود بالنيل والضل..





مين بتحدى جوارك ويصبح

في بستانك شتلة فل

مين يا سيدنا وروحنا وريدنا

ومين يا نورنا وأمل الكل..

كيف لحظاتنا بتبقى حقيقة

ووهج احساسنا صباح مرسوم

وحنين برفـُـل

وكيف الشمس اتوضت بيك

والقمرة الطالعة عليك بتدل

في جوف السما والليل والغيم

بتقيف في الشارع وما بتدخل

يا الزول الشايل جرحو وطالع

نجمة تصارع ليل الذل..

حيموت الجهل العيب والخوف

والوطن ينزاح من صدرو السُل..