مش باقي مني شعر جمال بخيت

أهدي لكم قصيدة جديدة لشاعري المفضل الأستاذ الكبير جمال بخيت
مش باقي مني


مش باقي مني غير شوية ضي ف عينيا

أنا هادهوملك

وامشي بصبري ف الملكوت

يمكن ف نورهم تلمحي خطوة

تفرق معاكي

بين الحياة والموت


مش باقي مني غير شوية نبض ف عروقي

خُدي.. وعيشي..

وافتحي لي تابوت

أفرح بريحة ورد فرعوني

وربنا ف عوني

إذا دخلت الجنة ولاّ النار

هاشتاق إلي ضحكتك

وقعدتي ف الدار

والقهوة متحوجة

من طيبة العطار..

ف كل يوم الصبح

باشرب حليب قبطي

وف النهار والمسا

بامسك ستار الكعبة لو سبتي

واثبت إذا هربتي

أهديكي عمري وحسي وجوارحي

أهديكي جرحي

هو اللي باقي ف دنيتي لما خلص فرحي

مش باقي مني

غير شوية لحم ف كتافي

بلاش يتبعتروا ف البحر

بلاش يتحرقوا ف قطر الصعيد

ف العيد

بلاش لكلب الصيد.. تناوليهم

خدي اللي باقي من الأمل فيهم

وابني لي من عضمهم

في كل حارة مقام

وزوريني مرة وحيدة

لو كل ألفين عام

ألم الجراح يتلم

مش باقي مني غير شوية دم

متلوثين بالهم

مُرين وفيهم سم

كانوا زمان شربات

والنكتة سكرهم

شربتهم الخفافيش

في قلب أوكارهم

مش باقي مني غير شوية دم.. ماأقدرشي

أسقيكي.. مواجعهم

وبرضه ما أقدرشي

أرميكي..

وأبيعهم

يمكن ف مرة تعوزي تطلبيني شهيد

هاحتاج يوميها الدم

يمضي علي شهادتي

مش باقي مني

غير شوية قوة ف إرادتي

علي شوية شِعر من خطي

حاسبي عليهم وانتي بتخطي

وانتي ف صبح الدلال

بتعطري شطي..

مش باقي مني

غير شوية ضي ف عينيا

أنا مش عايزهم

لو كنت يوم هالمحك

وانتي بتوطي

في معركة مافيهاش

ولاطيارات ولاجيش

وانتي ف طابور العيش

بتبوسي إيد الزمن

ينولك لقمة

من حقك المشروع

مش باقي مني.. غير

شهقة ف نفس مقطوع..

بافتح لها سكة

ما بين رئة.. وضلوع..

ما بين غبار.. ودموع..

وأنا تحت حجر «المقطم»

ف الدويقة باموت

أنا.. والعطش.. والجوع..

يئن تحتي التراب

وانا صوتي مش مسموع..

ياحلمنا الموجوع..

من المرور ممنوع..

مستني لما يمر

موكب سلاطينك..

مش باقي مني

غير شوية رحمة من طينك..

علي شوية صبر من دينك..

مش باقي مني غير حبة غُنا تايهين

ف الضلمة مش لاقيين

حس الفواعلية..

ولا صوت مراكبي عَفي

فوق المعدية..

ولا صوت بناتي العذاري

في كل صبحية..

والغنوة.. أمنية

«ياما نفسي أقابل حبيبي..

وانا ع الزراعية»..

صوتك وصوتهم غاب..

وانا تحت حجر المقطم.. باموت لوحديّا..

الليلة راحت عيوني

تطل ع البستان..

وجناين الرمان..

رجعت لي توصف عناد الغل والدخان

وسحابة سودا تضلل

علي الغُنا الغلبان..

رجعت لي توصف هبوب الموت

علي الألوان..

رجعت لي توصف..

.. خيال الذل..

ف موائد الرحمن..

مش باقي مني غير شوية كُفر بشروقك

وأنا..

منبع الايمان..

مش باقي مني..

غير شوية ضي..

وعينيا

مش قادرة تلمحني..

في وحدتي محني..

خايف أموت م الخوف

والضعف يفضحني..

...

السجن عشش ف قلبي

وماشي ف شوارعك..

نفس اللي باعني وخدعني

بالرخيص بايعك..

هاشيل حمولي انا

ولا هاشيل حملك ؟!

ماعدت أملك شيء..

فيكي.. ولا فيّا

ولا قيراط ولا بيت..

ولا نسمة صافية تلاغي النيل بحرية..

مش باقي مني

غير شوية حب جارحّني

ولا باقي مني

غير شوية ضي ف عينيا

رائعة وراااااااااااااااااااائع ذوقك فى الاختيار

استاذ منير

دمت بكل خير وسلام

انتي اللي رائعة يا أستاذة هناء دمتي لنا بكل خير

الجميلة ملكة الشاعرات الأستاذة عزة أشكرك على مرورك الجميل الذي يسعدني كثيراً , وأتمنى إن شاء الله لما أنزل مصر في الصيف إنك تعرفيني على جمال بخيت لأن دي أمنية بالنسبة لي . لكي مني كل التحية والتقدير .

اخى منير منيب
دائما ما يكون اختيارك رائع جدا
قصيده فى منتهى الروعه والجمال
أشكرك على امتعنا بهذه الاعمال

اختيار رائع لقصيدة جميلة
اخى الحبيب
أشكرك بشدة على منقولك الجميل

أخي وحبيبي أستاذي وأخي الأكبر عادل عوض أشكرك على مرورك الراقي وأنا دايماً بحاول أختار الأعمال اللي تليق بيكوا لأن فعلاً المنتدى ده بيضم أفضل ناس عرفتها في حياتي لك مني كل التحية .

الأخ الأستاذ أحمد علام أشكرك على مرورك الجميل تقبل تحياتي .

الأخت الجميلة أميرة الرومانسية الأستاذة أميرة البدري أشكرك على مرورك الجميل الذي يشرفني دائماً ودائماً لما بانزل أي عمل أبحث عن ردك علشان أستمتع بيه . بارك الله لكي .
أخوكي ( منير منيب )

أستاذي الكبير العملاق الأستاذ عاطف الجندي أنا اللي أشكرك كثيراً على مرورك الجميل , وعلى اتاحتك الفرصة لي لدخول هذا المنتدى الذي جعلنى أحظى بصحبة أرقى وأحب الناس . تقبل تحياتي العطرة .
أخوك ( منير منيب )

الأخت الفاضلة الأستاذة الشاعرة الكبيرة وداد الهواري أشكرك على مرورك العطر وطبعاً انا رؤيتي مش حاتكون زيك لكن أنا باجتهد على قد قدراتي سواءً في الكتابة أو في اختياري لأعمال شعراء آخرين وإن شاء الله مع الوقت أكيد كل شيء حايزيد عندي بسبب احتكاكي معكم . لكي مني كل التحية والتقدير .

أخي الحبيب الشاعر العملاق عمرو زتون أشكرك كثيراً على مرورك العطر والحقيقة أنت اللي أحلى دماغ في الدنيا يا عمورة وأنا بتعلم منك الكثير بجد مش مجاملة .