نقطة لقا

ولسة حيفضل نقطة لقا

حتجمع مابنا

وترسم طريقنا

ومهما بعدنا

حلفنا وعاندنا

حنتلاقى دايما فـ نقطة لقا


مسيحي ومسلم

وبنهم مسافة

بتبعد مابنهم

في قولة خرافة

يقول قال ده مسلم

أقول ديني أسلم

ويتلاقوا دايما فـ روح الفضيلة

ده غير أن دارهم فـ مصر الجميلة

ونرجع نقول فيه نقطة لقا


وأهلي وزمالك

خناقة ومعارك

ومين اللي غالب

ومين اللي سالب

ومين اللي خاسر

ومين اللي كاسر

ويتلاقوا دايماً في روح منتخب

وينسوا اللي بينهم في فاز واتغلب

وبرضه باقول دي نقطة لقا


ونلقى الغني

ونلقى الفقير

ده شايف لي نفسه

يقول ده حقير

ومنهم في شر

ومنهم في خير

ولما بننزل تحت التراب

بيتساوى كله يوم الحساب

ونار ولا جنة دي نقطة لقا


وبنا القوي

وبنا الضعيف

بجسمه القوي

يشمر دراعه

وغيره منطوي

وناسي متاعه

ولحظة يمروا سيان بالمرض

ووهم الفتوة بيصبح عبط

ويصبح مرضهم نقطة لقا


وراجل وست

وواد ولا بت

يقول أنا سيد

تقوله ياسيد

أنا برضه حرة

وتكويني مرأة

ويلقوا مابينهم أجمل عيال

بينسوا القضية وتصبح خيال

وراجل وست يدوبوا في لقا


وباحلم ألاقي

فـ نقطة لقا

لقاء التلاقي

تعبت بقى

لقاء ويا نفسي

ونقعد سوا

تقولي أنت فين ياأخي من زمان

أرد وأقول ده خدني المكان

وعمر مابنا مايحصل لقا

..........................