نقطة الصفر

البداية لما تلقـــــــــــى ... حد يلفت انتباهـــــك
عنده حاجة كت ف نفسك ... حاجة ناقصة من حياتك
تبتدى تحلم بلونها ... وبصداها وبظنونها
تحتويك تاخدك شجونها ... تبكى ع العمر اللى فاتك
===========
تنسى انك كنت عايش ... قبل منها وكنت راضى
كنت قانع كنت رائع ... رتم عمرك شيك و هادى
تنسى ماضيك اللى عدى ... واللى فاتك واحدة واحدة
وتفتكر بس النهاردة ... وتشترى الحاضر بماضى
============
وان صحى بالصدفة قلبك ... تفتكر فجأة اللى حبك
واللى ضحى يوم عشانك ... واللى جوه عيونه شايلك
تفتكر قصة غرامك ... واشتياقك واحترامك
والاغانى اللى ف كلامك ... والحنين يفضل يشاغلك
============
تبتدى الدوامة تكبر ... والصراع يفضل ماليك
الامل الوان تحير ... واللى فات يترجى فيك
وانت متشتت وخايف ... والقرار خلف الشفايف
بس متأكد وعارف ... انه موش هيّن عليك
=============
وقتها هتلاقى نفسك ... بعد تل من الامانى
صعب تخرج بره جلدك ... صعب تبقى يوم انانى
والتنازل يكوى حلقك ... يخنقك يفضل مضايقك
بعدها هتلاقى ضلك ... رجعك للصفر تانى

                        الاخ الشاعر
حسن صابر
الله على نظمك وجملك الشاعريه الرائعه .
فاول شيء يشدنى لاى نص هو الوزن .
وانت هنا كتبت بميزانك الحساس وسرت بنا على البحر الغنائى الجميل وهو الرمل ..
فاضافت موسيقى الشعر رونقا خاصا بحرفك .
انت شاعر يعى كيفية كتابة القصيده وهذا ما يميزك اخى حسن .
اشد على يدك واتمنى ان أقرأ لك المزيد من ابداعاتك .
مودتى وتحيتى ...