نقطة تفتيش
ولأن عينيكي يا مولاتي ..
جواز السفر المستخرج..
من قسم الشرطة التابع ..
مديرية آمن العشاق
ومدوّن في سجلات الروح ..
إني مسافر لحدودك
وماكنتش هاعرف إني ..
هايتم القبض عليا لمّا اوصولك
مع إني بحبك
وف حبك اتعلمت فنون الشِعْر
وعرفني الشِعْر
وفَطمت القلب عليكي
واتعلمت اتنازل عن عِزّة نفسي معاكي
ومش خجلان
وعرفت كمان
إن تاريخ البشر الممتد بجد
بيبدأ من جد عينيكي
وان السبب الأوحد لوقوف النيل
لما مشينا على الورنيش
إنك بصيتي عليه
حتى الموج الهادي
إصطف على الشطين
وبيعزف على أنغامه ناشيدنا الوطني
وان نزول المطر الذايد فى مطروح
علشان برضه كنتي هناك
فتسجل إنه العيد القومي الإستثنائي
وعرفت أقراكي وبتشكيل
في كل لغات العشق الـ مش مكتوبة
وان القناديل اللي بحدفها الموج ع الشط
بتنوّر لما توفك
إتعلمت أعيد تكويني وتشكيلي الجغرافي
واشطب كل التفاصيل الـ مش مرغوبة
كلمة ف سِرّك
إتعودت أكون اللعبة اللي بتكسرها إيديكي
ومش ندمان
واتعودت حضور الندوات الثقافي
شرب الشاي ع القهوة
واتجرأت وحطيت صورتك خلفية ..
على وِش موبايلي
ومش محتاج ليعنيا أشوفك بيهم
ولا لإيديا تضمك
ما انتي كسّوة جسمي
وبفرح لمّا حروفك تسبق إسمي
عرفوني الناس
وبان في عينيهم
وعرفو ا بإنك مصدر كل قصايدي الموجودة
واللي ف عِلم الغيب
عرفوني بإني بحبك ..
وأكتر واحد بيحبك على وِش الأرض
ولإنك مرسومة على جسمي خريطة
ومحيطة بكل اليابس والأخضر
وبحور الشِعْر
وكإن الشمس قصيدة وبنت حويطة
مش عايزة تغيب عن وِشك ابداً
بتغازل موج البحر
وتنزل , تغطس , تغسل ضفايرها ..
ونن عينيها
علشان لمّا هاتطلع تاني ..
عايزة تشوفك أجمل
وعروقي زي خطوط الطول والعرض
وبـِفرْض بإني عِشقتك
ومخبّي القلب النازف عِشق عشانك
بيعاني الموت
خبيته في شنطة عمري
وعمري ما كنت مخالف ..
لقانون العِشق المسموح
يتم القبض عليا !!!
والله ما كنت مصدق إني هُنت عليكي
وقفلتي حدودك
وبإيديك .. لغيتي وجودك من جوايا
وراميتي السلك الشايك
بيني وبينك
وبيني وبينك ..
بلعن خوفك اللي هزمني
ومنعني من إني أشوفك
وكإني متبلغ عنّي ..
من حرس البرج الواقف فوق أسوارك
والقلب النازف عِشق عشانك
بعد ما كان بيعاني الموت ..
اتنفخت فيه الروح
وف أول نقطة تفتيش ..
إتصادر منَي .
……………………………..
الأحد نوفمبر 17, 2024 9:53 pm من طرف 
موضوع: قصيدة / نقطة تفتيش لـ/ عمرو المصري 
