فى ذكرى العندليب عبد الحليم حافظ

ضاع النغم مـ الوتر

والوش جننى

والفن حاله اتعوج

وأنا لسة مستنى

تعالى عيد فننا

يا عندليب غنى

يا مسك أهل النغم

يا كف متحنى

هاجرت طيور الغنا

ما اعرفش راحت فين

كل الأصيل اغترب

وتاهت العناوين

كل اللى فاضل نشاز

قاعد على الصفين

زى الردئ الهزيل

عايم على الميا

أما الأصيل فى النغم

بيدفنوه فى الطين

يا عندليب فننا

شوف الطرب مالُهْ

دحاله أصبح عدم

تعالى شوف حاله

بقى النغم درَبُكهْ

فى كل أحوالُه

والكل غاوى غُنا

فرحان بمواله

والحظ لو يخدمه

يبقى النقيب خالُه

تمشى الأمور والسكك

تِسلك وتحلى له

يا عندليب النغم ...

سيرتك خلود فـ خلود

فنك برغم السفر

فوق الجميع موجود

والغصن مهما دبل

يفضل عبيره يجود

والتوبة فيها الشفا

زى الهوى وموعود

الفن فين يا حليم ..؟

عمر اللى راح ميعود ؟!
____________
شعر : إبراهيم خليل إبراهيم

أميرة البدرى كتب:

الشاعر الرائع ابراهيم خليل ابراهيم
قصيده رائعه جدا اثرت فيها ما يحدث الان
من مهازل قى دنيا الطرب اللى مبقاش طرب
وبقى اى حد يغنى وخلاص
كتبتها بأسلوب رائع
دمت بكل سعاده
تقبل مرورى وتقديرى

____
المبدعة أميرة
شكرا على رأيك
وسعدت بتواجدك

الشاعرة عزة الزرقانى كتب:

ودائما راعى للأصاله والفن الجميل

استاذ ابراهيم خليل

دمت بكل خير

___
المبدعة الرقيقة عزة
شكرا على شعورك الطيب
ونعم .. العندليب لايغيب

هل من مترجم لهذا النص ؟