طلب نقد ودراسه لنصى ( نزوه الواحد اكيد )

نزوه الواحد اكيد


مفتتح
...............
مسحول على ضي القمر
ضلي
مكسوره شوكه نفسي اللي
ف حشايا
مطبوع على بطن السما
كفى
من بين صوابعى بكت
على سر جوايا
.........................

هز الجبل
يمكن تحس ف هزته
ب المرجحّه
وتجيب معاك كبشه حصى
تبنى لي بيت أربع أوض
أوضتين ... ل وقت الملتقى
والتالته ... ل أوقات الفراق
والرابعة ... يسكن بطنها فيض من مشاعر حبنا
اللي اندبح ب الاحتجاج
افتح دراعك للهوى
واحضن رياح الاعتراض
مش كل حاجه ف دنيتك بنت احتمال
مش كل حلم ب يتولد قبليه مخاض
سوق الكلام
لساه ب يفرش نصبته بين السكات
كومبارس ب يعانى الوسامة
وأميره من حواديت مسرح عرايس ازمتى
والمخرج السكران ب سم الاحباطات
ب يمثلوا الفيلم الاباحى
للحضارة
وحكاية الصفحة الاخيره ف الكتاب
يا أميره من ريحه عذاب المقهورين
يا سندريلا مزوقة خد القمر
ليه الحروف فارضه الوصايا على النقط ؟
ليه الغنا دايما نشاز ؟
موال على شط الزمن
يوصف مشاعر بحر ب يعادى السمك
يشرح ف شوق المصطافين للدردشة
ونشوه الرمل اللي دايما يسطلوا
كعب البنات
دايما تلوم الأمنيات
مع انك الحلم اللي عايز يتسجن
بين الخيال
نسمه عصارى محمله
قطر الندى
ب تعاكس الرغبة الملحّه
ف الحياة
وقت انفجار العقل بفنون الغزل
ف معاشره الشازلونج
ومعاكستك بنت الجيران
كان لك زمان .. حبه صحاب
تاهم ف دوامه زمن عامل أصيل
بس انكشف
لما ارتفع سعر السولار
لما كتبت في دفترك
حسبه مشاعرك
ب الدولار
لما الأمان راحت عليه
وأما انتحرت عشان جنيه
يا ضل من وهم اللاشيء
يا وهم من ضل العبث
أنا سني ماله ب يبتسم
مع إن أنا قلبي عبس ؟؟؟؟!
وأما احتضر ضي النهار
على فرشة الليل الحزين
كان وقتها عيل عبيط
واقف على قمة جبل
مستني يتشق الحصى
ويخرج السر اللي كامن ف الضلوع
يمكن ساعتها يتولد
من قلب دوامه عدم
مخلوق جديد
ويكون في دنيا الاحتمال
واحد أكيد