أكيد الضميرمخنوق

السلام عليكم .. مجرد رأي

تحياتي وتقديري

( أكيد الضمير مخنوق )

.......

من سنين
وانا قلبي ساكِن
مِش حَنين
من حبي
لكن ...
نفسه يهرب م القُيود
ينده الفجر اللي طالع
تسمعه كل الخلايق
يكتب معاني وحقايق
داخت ونايمه ع الحدود
جوَّا بير ملهوش قرار
يلملم حروفه اللي تاهت
في بحر وموجه كان غدار
يفرد كلام صهد ناره
يحرق سفاين جوه البحار
خايف ينكوي بنار كلامه
ينسجن جواه النهار
يندفن جوه قبر الجنون
عايش وحكْماه الظنون
إحكي ياقلبي
وانا هاسمعك
و ان كدبت هاصدقك
لو شطحت بره الحدود
لو شطبت إسم الجدود
بس تحكي...
من غير دموع
الموضوع..
إني شايف من الناس عجايب
رحاية دايره
من غير طحين
بس في البرواز حبايب
وكل واحد له عجين
قادوس يدوس حتي البراءة
من غير فلوس
بس بحداقه
خمرْ واعجن
شمَّرْ وادفن
كله في الفرن عيش
يطلع بارد
يطلع ساخن
المهم الناس تعيش
إلعب بيش
من غير مناوله
إكسب شيش
إعمل أي محاوله
إهرب ماتجيش
الخسران يدفع بقشيش
والكسبان يطلع بما فيش
الغلبان يمسك جرنال
يقرا كلامه بالمقلوب
بين صفحاته
يشوف أهوال
جناين طارحة قوالب طوب
والحقايق تبان دقايق
وبقية الحياة موال
والخلايق أكيد بتدايق
من كلام كتير مكتوب
وفيه ناس تدقق
وليه ناس تحقق ؟
والحيرة ماليه قلوب
والشطارة جوه العبارة
البطل يبان مغلوب
وصوره عريانه
من غير أدب ولا ذوق
والتانيه مليانه
تبص ليه من فوق؟
إنسان وعايش منكسر
دايخ في جبانه
محتار وغيره مقتدر
والنِّفس نعسانه
ينده عليه القمر
يتوه جواه ويغيب
ينسي الإله ويخيب
وياريته مره يفوق
كلام , أنا قلته
ويمكن سهل نسيانه
وف قلبي شلته
وبين السطور تبيانه
المعني جوه الضمير
عايش أكيد مخنوق

أشكركم

وللجميع تحياتي