قناة الدراما

بغير في مرة قناة الدراما عشان بس تيجي قناة الهموم

وأتاري الريموت اللي لساني جايبه معلق وبايظ ومالهوش لزوم

فوقفت زرايره على الأولى مصري فقلت اما اشوفها وبعدين أقوم

لقيت الأحبة في مجلس بقبة بيحكو حكاوي كما كل يوم

شوية يهاجمو وشوية يدافعو وشوية عينيهم ما تشبعش نوم

اتاري دي جلسة في مجلس بلدنا وصوت على البيع بتمن الهدوم

وأسمع ساعتها عبارة مواطن احس ان راحت سنين الهموم

احس ان افقر مواطن ساعتها بيتعشى فاكهة ويفطر لحوم

واحس اني هابقى من الصبح باشا واحس ان خيرك مسيره يدوم

بإجماع ارائكم تقرر في حينه بتصويت جماعي وجاي م العموم

موافقة ومنافقة واجماع مجهز على البيع واوعي سيادتك تزوم

لا تخفى الحصانه وتمضغ لبانه ومن كتر فقرك ها تتغدى دوم

ويمكن كمان ما تلاقيش حتى لقمة ويوم يبقى دقة واسبوع تصوم

ده ايه بس ده اللي هبلني في عقلي ما تخفى السياسة وتخفى العلوم

ويخفى الريموت المعفن في داهية وتحيا الدراما وتخفى الهموم

وأتاري الريموت المعفن حجارته ضعيفة رميته وقضيتها نوم