آه يا قناة

بسم الله الرحمن الرحيم


آه يا قناة


اه يا قناة ويا حول الله
سعودية و لكن مؤذية
ذدتى علينا مرار الآه
بأذاعة رمز الحرامية
كنت يا عالم فايق رايق
خالى بجد ومش مضايق
لكن فجاءة اتغير حالى
ولقيت دمى كأنه حرايق
لما سمعت ابو الفجار
راس منصر حزب الاشرار
بعد تباطئ ولا تواطئ !!!!
جى بيقولنا كنزى اهو طار
حطة يا بطة يا فلفل شطة
أضربوا راسكوا ف اى جدار
عضوا الارض ونادوا ف مالطة
وافتحوا مندل واعملوا زار
تعرفوا انى ما خدتش حاجة
وانى برىء واديا نضيفة
وان ما فيش ولا حاجة تدينى
ولاراح تلقوا معايا تعريفة
اصل خلاص الليلة انفضت
واتحلت ودى وبنعومة
ودبيحة احلامكوا اندفنت
ولا يمكن هيقوم لها قومة
وخلاص ناوى كده اربيكوا
وشرف امى كمان لقاضيكوا !!
واللى ما يشترى راح يتفرج
راح اجرسكوا وابهدل فيكوا !!
واما انتهت الكلمة يا خلق
حسيت قلبى يدق ببطئ
جالى هبوط وجفاف فى الحلق
كما لو انى فقدت النطق
واللى قتلنى كده م القهره
مش كدبه وفجره الحيوانى
اللى قتلنى يا ناس م الحسرة
ان دا لسه بيستغبانى
وحصر كل مشاكله معايا
فى فساد الذمة الملويه
وكأن ف تلاتينه البائسة
كل مشاكلى كانت مادية
يعنى لا باع احلامى وعمرى
ولا قيد فيا الحرية
ولا كان بانى السور العازل
ولا باع الامة العربية
ونهايته بعد الكلمة ادى
ما تفكرش اننا هنسيبك
ولا يمكن ابدا نسمح لك
انك تخلع كده بنهيبك
انت وكل فخامة اهلك
غصبن عنك هنا هنجيبك
ولا راح ناكل من حركاتك
ولا هنصدق هجص نحيبك



تمت

محمود قطب