الخط الأحمر . قصيدة للشاعر / عمرو المصرى .

كل لغات الأرض قديمة
ومش قادرة تقولِك
عاجزة عن وصف ملامحك
وبوسعي أرسم كل ملامحك بالتفصيل
وحدي / أمتلك اللغة الخاصة
علشان أرسم حتى أدق التفاصيل
لغتي .. الممزوجة بكل بحور الشعر
وان كانت مختلفة فيها التفاعيل
على قد ملامحك بس
وماحدش يقدر يتهجاها حروف
لغتي .. مابتعرفش أمان
ولا تعرف خوف
ماتحبش اكون مكسوف ..
وانا بارسم صورتك
وبجرد كل حروفك ..
من أدوات التشكيل
ونقاط الضعف
وعلامات الاستفهام
مابتتقلش كلام
مابتتحطش على أي سطور
ـ علشان تظهر بالترتيب ـ
لكن وقت ماباكتب عنك ..
و اوصف صورتك
السطر هوّ اللي بيمشي ورايا
بجد / ويتمد بحد حروفك
لغتي .. من وقت ماخرجت منّي ..
وبدأ العالم رسم خريطة حب جديدة
وبدأ التقويم العشقي الميلادي
وبدأت في التنقيب
في قواميس الكلمات
طول اليوم مابتتعبش
رغم العطلات الرسمية ..
مابتعرفش أجازة
أو أي استثناءات
علشان تقدر تستوعب ..
كل مساحة وصفك
لغتي.. مابتقبلش القسمه
أو تعرف شكل التزوير
خاليه من أدوات النصب
لغة تفصيل
منسوجه من أضواء الشمس
أو من ضي القناديل
منسوجه حرير
وحروفها ..
زي العصافير
بتطير وتحط في جنة عشقك
لغتي ..
سألوني عليها
إيه مصدرها
ساعتها فرحت وقلت دخلت التاريخ
وانا متأكد إني معاكي
دخلت التاريخ
أو كتبوني في موسوعة الأرقام القياسية
لكن .. اتهموني بالتحريف والتغيير
واتهموني بقلب نظام الحكم
واني عديت الخط الأحمر
واني السبب الرسمي لتسونامي
ولكاترينا
وكل الأعاصير
اتهموني بالتشفير للنثر
ولشعر الفصحى والعاميه
وكل القنوات العربيه
ساعتها عرفت بإن ماحدش شافك
ولا صابه سهم عينيكي
لغتي ..
الموجودة في كتب الجغرافيا ..
والنايمة في حضن الاهرامات ..
واللي بتسهر طول الليل ..
تتغزل فيكي
في معبد حتشبسوت ..
هاتموت لو قالت غيرك
الحاصله على شهادات التقدير
في التعبير عن حبي اليكي ..
شبهي تمام
ماتحبش شرب القهوه السادة
وتحب التدخين
وبتكره كسر الاوزان في الشعر
وبتعشق صوت الست
وصوت الطلبة في مدارسهم ..
لما يحيّوا العلم الصبح
وبتعشق طعم النيل ..
مع طبق الفول بالزيت الحار
وبتسمتع بقراية القرآن
ويخدها صوت الأناجيل
وبتِحْضر يوم الاحد مع الرهبان
كانت واقفة ع الضقة في ستة اكتوبر
وتشد إيدين العسكر وتحيهم
وتغني وترقص تاني معاهم..
بعد النصر
وف آخر الليل ..
كالعادة ..
تفرد أيام الماضي وتعدّي لغرفة نومي
تعدل براوزها المقلوبة
وتقرا قصايدي المكتوبة
وتفُك الأحلام المصلوبة
وترتب لى هدومي في الدواليب
واما تخلّص..
ترمي بخواتمها على التسريحة
وتخلع أساورها
وتفُك ضفاير ليلها
وتفرد على قد ما تقدر ..
من ليل العشق الساخن جداً
وتعطر ريحة الغرفة ..
بريحة أنوثتها ..
اللي اتعود عليها حتى وهى مش موجودة
وتخلع فستانها ..
وتلبس من قمصان النوم ..
واحد جبته هديه لفتاة أحلامي
وتقضي الليل في سريري
بتداعب فيّ
وتمارس كل الألعاب اليومية في حضني
وتصحي الرغبة المعتادة
لكتابة نص جديد .

عمرو حبيبى .. نورت المنتدى

والله اسعدتنا وشرفتنا بأنضمامك لاسرتنا الادبيه .

اهلا وسهلا بيك حبيبى والله على نصك الاكثر من رائع .

تسلم ايدك واحييك لامتاعنا واسعادنا بحضورك ثم بنصك .

مودتى ياغالى ...

عمرو الغالي
وحشتنا ووحشنا وجودك أيها الرائع
قصيدة جميلة كعادتك
تقبل ود أخيك

» فيديو قصيدة ( بيت العيلة ) للشاعر المتميز عمرو زيتون
» قصيدة / نقطة تفتيش لـ/ عمرو المصري
» حورية من جهنم للشاعر (عمرو قطامش)
» رد (الماهية) للمستوظفين فقط للشاعر رأفت المصرى
» استرنى يا الله