صرخة أم

إيه بيجرى جوّه بيتنا ؟
إيه جرالك يا هيبيتنا ؟
انتى واخده هدنه ولاّ
ضيّعوكى من طيبتنا ؟
انتى فعلاّ ضعتى .. لكن
جوّه بركان لسّه ساكن
لو يثور حا تلاقى ناره
واحمــــــــــــــــراره
والحمم نازله بتحرق
كل أخضر .. كل يابس
ياللى عابث
جوّه اول قبله لأه
ده ميراث المسلمين
ربنا حا يرده لينا
لو نكونوا مسلمين
راح نقولّك مثل مين
مثل خالد .. مثل طارق
مثل عمرو اللى أمره
كان بيمشى
عالصغيّر والكبير
راح نقولّك نسل مين
نسل سيدنا اسماعيل
اللى جه من نسله خير المرسلين
همّا دول المسلمين
هيّه كلمه
راح نقولها لليهود
ده صراع حق ووجود
مش صراع ارض وحدود
يعنى قدسى حقنا لزماّ تعود
يرجع الأقصى ف إيدينا
أصله حق ودين علينا
نصرة الدين اللى انتو
نفسكم تفنوه بإيديكم
هوّه دا الأمر اللى كان
لما قالوا الأمريكان
للصهاينه
اللى ما يدّوش أمان
إضربوا الإسلام بقوّه
برّه .. جوّه
واشربوا نخب انتصاركم
واطفوا ناركم
واعزموا كل الزباين
ماضى اسود لسّه باين
مش حا يحصل
انكو تنولوا المراد
لأ ورب العزه واله العباد
ياللى ساندنكم اميركا
فى المدابح من سنين
مين حا ينسى دير ياسين ؟
مين حا ينسى
صابرا كانت أو شاتيلا او جنين ؟
والمدابح اللى قايمه ف كل مطرح
قصدى مدبح
قصدى مسرح
أرضه كات ملك العروبه
مسرحيه بإسم { طوبه }
والبطوله للطفوله
ويّا احداثها الأليمه
ويّا احداثها العظيمه
{ فصــــــل أول }
طفل طالع فوق كتافه
شنطه فيها كتاب ودفتر
ناسى أكله وناسى يفطر
فكره كان ناسى القلم
{ فصـــــــل تانى }
هوّه نفس الطفل راجع
جثه ملفوفه بعلم
{ فصــــــل تالت }
أم واقفه شفت ف عنيها الألم
كان وليدها بيندفن
قدّام عنيها وفإيديها
طالعه جايباله القلم
أما إيدها التانيه كانت
ماسكه لفّه
فيها لقمه للفطار
لقمه مخبوزه بمرار
اللى لسّه سخن نار
اللى كانت حاشياهوله
بالأمومه
حاشياهوله بالنعومه
حاشياهوله بالكرامه
والعنايه والرعايه
{ والنهــــــــــــايه }
بوسه ف جبين الشهيد
شيّعوه كعريس بيدخل
دنيا تانيه من جديد
والهتـــــــــــــاف
نعش محمول عالكتاف
كل يوم من ده آلاف
والتراب مفتوح بينده
نزّلوه بشويش دا إبنى
م الليلاتى ينام ف حضنى
آه .. يا إبنى
ليه تسيبنى ؟
دا انت لسّه ياابن عمرى
طفل وف عمر الزهور
لسّه نــــــــــــــــور
با استمد الضى منّك
يبعدونى فجأه عنّك !!
مش حا نزعل
دا انت موتك يا ابنى خلاّ
عندى عزه
انتو متّوا لجل يا ابنى
غيركو يحيا
انت رايح جنّه يا ابنى
بيك حا تحلا
حور حا تاخدك
من إيديك ف اجملها رحله
سبت أمّك .. سبت همّك
بس نازل حضن أدفى راح يضمّك
انت راجع حضن أمّك
حضن سايع منكو يا ما
بالسلامه .. بالسلامه
بالسلامه .. يا ابن عمرى