قصيدة أنا إنسان....لشاعر كفر الشيخ محمد مصطفى الصعيدي

أنا إنسان
ما تسألنيش عن إسمي
ماتفرقشي
يجوز أحمد ... يجوز حسنين
وما تسألشى ساكن فين؟...متفرقشي
يجوز ف (المنيا ) أوفي (شبرا) أو( قلين)
ولا تسألش ع المهنه
يجوز واعظ على منبر..
يجوز مأذون
بيكتب يوم كتاب (عبله) على (عنتر)
يجوز اسطى على مكنه
بينسج م الأمل ...فستان
يجوز شاعر ..يجوز فنان
لكن مهما أقول وأعيد
متبقاش زي ما أهتف بصوت ملياااااااان
أنا إنسان....
.........
أنا إنسان بسيط ..عادي
وعايش جوه بيت ..هادي
في أوضه وحيده
ما عرفت حيطانها الجير
حصيرها ضم أولادي
فقير؟؟؟
يعني
لكن ماشيه ومستوره
وقالوا زمان مثل ساير
بإن الفقر ماهش عيب
وعمر ما حط من قدري وقدرك يوم ..خلو الجيب
أنا ماملكش غير الحب
لسان دايما يقول :يارب
ودعوة أب
وبنت حلال مهاوداني
تملي ألقى بسمتها على بابي
مقابلاني
وغير كلمة : (نعم ) (حاضر)
ماسمعت منها وداني
وراديو قديم
مالوش مينا
ومرسومله مؤشر بس للزينه
يسمعني أدان الفجر في سيدنا (الحسين) يدن
واسمع نشرة الأخبار
في (وسط الدلتا )وف (لندن)
وبوداني..وفؤاد ملهوف
وراس بتلف
أتابع نشرة الأخبار
وأخبط كف فوق الكف
واستعجب
وعجبي مايلاقيش مطرح
عشان لسه قانون الغابة في عالمنا
واقف وحده ع المسرح
في خبث خبيث
بيتبسم
ويشخط ف الحضاره
هس...
أنا لوحدي رح أتكلم
أنا السيد
برغم ( الفيديو)والقمر الصناعي
وتكنولوجيا العصر ... والجامبو أنا السيد
أنا السيد ..أنا السيد..
وصوته ضاع
في وسط إيقاع
موسيقى (الجاز)
وضحكه خليعه
مطبوعه في قلب شريط من (الممنوع)
ونظره مزغلله
تايهه
ماهش عارفه ايه الموضوع
وروس فارغه
بتتمايل شمال ..ويمين
في سهره تضيع الملايين
وناس ناويه تبيع ذاتها
قصاد شمه من ( الهرويين)
وشنطه مسافره ومسافر معاها الموت
في طياره
في سياره
وفوق أرضية المأساه
تلاقي (بيان)
بيعلن: مسئولية ناس
بتبسطهم دموع الناس
واشكي
والأسى غالب
وابكي
والدموع مره
وتفتكروا بكايا يفيد ؟؟
في عالم فجر الذره؟؟
صنع منها سلاح للشر
قبل ما يجني ع المضروب
بيجني برده ع الضارب
ولا مغلوب
ولا غالب
وأنا الإنسان
أدور بمؤشر الراديو هنا وهناك
يوقفني مذيع صوته
يبشرني بصباح بكره
على فكره
مدام لسه قانون الغابه
واقف وحده يتعاجب
وصوت العقل
ف الدنيا
ماهش عاجب
حتلقى خلق بتحارب
وياما خلق هتحارب
وياريت...
كلنا نحارب..
بدون طياره..
أو دبابه..
أو مدفع..
لحد ما نلقى شمس الحب
في كل النفوس
تطلع...

أريد أن أؤكد أن القصيده لوالدي الشاعر محمد مصطفى الصعيدي اما أنا فمحب للشعر والشعراء ومجالي هو الفنون التشكيلية والتي لا أرى إختلافا بينها وبين الشعر كثيرا

د/ عادل
بداية احيى فيك وفاءك الرائع لرحلة ابداعات الوالد الحبيب
أما عن شاعرنا الكبير والدك الذى لم يأخذ ما يستحق من الشهره رغم قصائده المبهره
اقول له حسبك انبهارنا بابداعك
فأهل هذا المنتدى مبدعون حقيقيين لا يجاملون ،
وأنت فارس نبيل فى معترك الشعر
فصل وجل فمثلك جدير بالمقدمة
أعود لدكتور عادل أشد على يديه تقديرا واجلالا على مسلكه الفريد فى نشر اعمال والده
دام وفاؤك

أشكرك جدا جدا جدا أستاذنا الكبييييير أستاذ عبد الله جمعه
وأشكر صاحب الدار الأستاذ الشاعر الكبيرعاطف الجندي
والشاعر الجميل الأستاذ عادل سند
والشاعرة القدييييييييييييييييييييييييييييره عزه الزرقاني
بالنيابة عن والدي أشركم جميييييييييعا على حسن الترحيب

استاذنا الكبييييييييييييييييير عادل سند
خالص الشكر والتقدير لحضرتك
وانا دائما ما أقرأ ذلك الحب للناس في وجهك المشرق دائما
خالص الشكر والتقدير

هى الكلمات الجميله دى كتبها شاعر من بلدى طيب حد يقولى منين طيب اوصله ازاى

الاستاذ عادل محمد مصطفى
كل الشكر لك على نقلك لهذه القصيده الرائعه
التى تحمل معانى واحساس وكلمات ومفردات
غايه ف الروعه والجمال
وياريت متحرمناش من اعمال والدك استاذ محمد
علشان نستمتع اكتر واكتر
تقبل مرورى وتقديرى

اكثر من رائع

بردة ماحدش قالى الشاعر الكبيردة منين من كفر الشيخ