الحب مات

حب إيه يا عم ( عاطف )
انتَ قلت الحب مات
راح في دوَّامة سكات
حب مش محتاج لشهر يعيده
دا محتاج قرون
وسنين
ترجع مجد فات
ذكريات
التاريخ عدَّا وسرقنا
واحنا بنخطط فراقنا
والمحبة بتفارقنا
واحنا بنرتل نفاقنا
وفي طريقنا
دسنا فوق كل الآيات
مرحبا شهر الكرامة
جيت عشان تلقانا في ذلّ وندامة
جيت عشان تلقانا في وهم ..
وممات
والتراويح اللي كانت ..
سجدة للخالق بقت ..
للزينة نتمنظر بها ..
يمكن تزيح عنا الآهات
آه يا ( عاطف )
ليه تقلِّب في المواجع
ليه تصحينا ؟
ما كنا مرتاحين جوه السُّبات
والغريبة
إننا عايشين بنحلم !!
حلم أهبل إننا أهل الحضارة ..
والعمارة
والكلاب دايسين تاريخنا
واحنا مش شايفين شروخنا
ودُخنا .. دُخنا
ولسة بننادي المَوَات
خلي بالك !
لسَّة فاضل فينا بذرة خير
ولكنِّ المطر ..
عن أرضنا عدَّا و فات