كرات الضحك

بتحط ايديك
على مكمن خوفك
مستنى ويائس من سن الشك
كاتبين على باب الغرفه
جنب اليافطه
ممنوع
ممنوع م الهزل
ومريض بيعانى وبيهلوس
من نقص كرات الضحك!!!
ووشوش عمرها ما اتفردت
للعيش السخن
طالعين داخلين بالشاش والقطن
والواقفه على سريرهُ بتفتح شباك الرغى
بتسابق بكلامها الريح
بتسابق الموت وبتنزف ضحك
علشان تسرق بعض الأسرار
وتعبى الأعترفات فى شريط
مش حاسه بان لسانهُ الساكت
مش حمل جواب
طول عمره بيعزف على وجعه
وكأنه الابن البار للصبر
أو ابن الصمت
مقرتش اليافطه المكتوبه
على نص الباب
الغرقه الخاصه لبتر الضحك
*****************
الوالد و الأستاذ الشاعر الجميل / عبده النجيلى
أشكرك لأن قلمك الجميل أستفز فيا النطق للتعليق
قصيده جديده عليك فى كل شيئ
و كأننى أقرأ لك للمره الأولى
فى السياق و اختيار المفردات و تركيبة الصوره
و الدليل على ذلك انها سحبت حسام إلى التعليق أيضا
أهنئك على النص و اتمنى أن أقرألك نصوص أخرى جديده