عروسة ماريونت

عروسة ماريونت
قلبى عروسة
ماريونت
وخيوط هواكى
مشعلقاها ف الهوا
تلعب ايديكى
ترقصينى
وتملكينى
بغنتوين
وبكون سعيد
لو حتى برقص
برقص غصب عنى
بس شرطى
ان رقصى يبقى طالع
من ايديكى
رقصينى واحلمى
ان العروسه اتحولت
قامت ورقصت
ويا حلمك رقصتين
على نغمه
منزوعه الشجن
معزوفه
من دقه قلوب
مليون عروسه
زىّ انا
ف ماتحلميش
ان العروسه
اللى طالعه
من ايديكى
نسخه ليكى
علشان احب ف امها
تقدر تغير شعره
واحده من
مشاعرى ناحيتك
ما انا حبى ليكى
زى غنوه
بس محتاجه
لنغم
تصبح كيان
اخر جنان
لما العروسه تعشق
اللى مشعلقاها
ف الهوا
فوق حفره
نافده ع الجحيم
وبتأمرينى انى
اضحك وابتسم
ف اضحك اوى
وانا بلمحك
جايبه المقص بتقطعى
اخر خيوطى
عشان اقع
ف حفره سابق ذكرها
الحفره مليانه
بلعب محروق
اديها ووشها
ليه كل قلب
بيدخلك
بتعشميه
يبقى بطل اوبريت
كبير
وبتدبحيه بسكينه
تلّمه من الفرح
ف بينسى
انه يسألك عن اللى قبله
هو فين ؟
جراله ايه ؟
و يرفّس المدبوح
حسب اوامر
حضرتك
وف حضرتك
لازم يطاطى بصلتة
ويفضل ذليل
ماهو حبه هو ذلته
اللى انتى ماسكاها
عليه
يجرالك ايه
لو ترفضى بكل احترام
احساس جميل
ليه تقّبلى
وتدس سم المر
جواه كوبايه سعاده
ماهيا عاده الغدر فيكى
ولا يعنى هاتشتريها
بس وحياة اللى ماتوا
جوه حبك مسمومين
لاعمل لقلبك
ميت عروسه يرقصوا
حواليا زى الممسوسين
لكن حقيقى بوعدك
انى مش راح اسمهم
واسمحيلى انى اقولك
كلمتين بره الحوار
هافضل انا
حته عروسه ماريونت
ترقصيها بنظرتك
لليمين او للشمال
ف لا جدال
انى بحب
ف حضرتك
وحضرتك
منفضالى من الاساس

عروسة ماريونت
قصيدة زاهية و رائعه استاذ عمرو
الشاعر الفنان
سعيدة بمرورى اولا على قصيدتك الحلوة

الابن الحبيب الشاعر
عمرو شاهين
لا حول ولا قوة إلا بالله العلى العظيم
ليه كده يا عمرو ؟
بقى انت عارف كل ده عنها ولسه بتحبها ؟
معقول يا عمرو !! نفضّلها زى ما نفضتلك
وخد عبره من اللى قبلك بس بصراحه كتر خيرها
انها بتستفزك فتخرج لنا روائعك الجميله .
والله قصيده جميله يا عمرو واهنئك عليها .
مع خالص ودى وتقديرى ...

الله عليك

تسلم ايديك

وانت عارف

رأى فيك

برافوووووووووووووووووووووووووو[b]

موضوع التنفيض ده يا جماعة
الظاهر شغال جميل اليومين دول
ههههههههههههه
نفض لها عمرو و الأمر لله

الجميل عمرو
أحييك على قصيدتك الجميلو اختيار مواضيعك الجيد من وجهة نظرى
فأنت لا تكرر نفسك و هذا جميل جدا بالنسبة للشاعر
و أراك تتجدد و تتقدم كل يوم
و يبقى فقط مراجعة بعض الخروج الموسيقى فى أحيان نادرة
و كتابة كلمات مثل ( جواه كوبايه سعاده ) و تقصد (جوَّا ) أى بداخل كوب السعادة
و هكذا
مودتى لروعتك
أخوك

شاعر متمكن
امتعتنى قراءة كلماتك
تحياتى

الاستاذه / بنوته مصريه
انا اسعد بمرورك وتعليقك الغالى
وسعيد بان كلماتى البسيطه قد حازت اعجابك
تقبلى احترامى
دمتى بكل خير

استاذى العزيز / عادل عوض سند
هاعمل ايه بس قطع الحب وسنينه
ياريتنى اعرف انفض لها كنت ارتحت من زمان
ومروك الكريم اسعدنى وتعليقك الغالى اطربنى
بس بينى وبينك كفايه استفزاز لغايه كده
انا قربت اتلحس خلاص
تقبل فائق احترامى وتقديرى
دمت بكل خير

الشاعره الكبيره الراقيه الرقيقه الاستاذه / عزه الزرقانى
عارف والله ولسه مصر ان رأيك اكبر بكتير من قدر شخصى البسيط
مرورك غالى وتعليقك بسيط رقيق
تقبلى فائق احترامى
دمتى بكل خير

الاستاذه/ بنت النيل
والله باين كده
بس هو التنفيض انتشر كده
وشكلى هاعمل بالنصيحه واحاول - رغم انى عارف انهاغ محاوله فاشله -
انى انفض
مرور غالى وتعليق رقيق
تقبلى فائق احترامى
دمتى بكل خير

استازى العزيز الغالى و الشاعر الرائع الراقى/ عاطف الجندى
اسعدنى كثيرا ان ما كتبت قد نال اعجابك
وساحاول عدم تكرار الاخطاء مره اخرى
مرورك الغالى اسعدنى كثيرا وتعليقك افادنى واسعدنى
تقبل فائق احترامى وتقديرى واعزازى
دمت بكل خير

الاستاذ / محمد السيد
مرور غال وكلمات رقيقه راقيه بسيطه
تقبل احترامى
دمت بكل خير

عمرو شاهين الشاعر المتأمل

العروسة آهيه على الصفحة الأولى تانى .. فكر .. حاول

نفض لها .. أعلم أنك لن تحاول لأنها داخل عمق قلبك ولن

تنالها يدك بأذى .

دمت مبدعاً

وداد الهـــــــــــــوارى

» عايز عروسة غير عروسة ماهر حامد
» عروسة
» مصر العروسة
» عايز عروسه
» عروسة لابسة خضار