مصر هي بنتي

مصر هي بنتي

ساعات باسأل وأفكر
باحبك ولا لأ
ألقى الإجابة تحير
بمناهدة ومناكفة
طب إيه يتحب فيكي
بعد مارمتيني بعيد
وكل ماأنوي أجيكي
أغير رأيي وأحيد
وارجع واقول ياأم
وصفوكي بالأُم
والأم لو حتغُم
تكرهها بقرفها
لكن أنا باوصفك بالبنت
في الزفة
فالبنت مهما عملت
حيحبها أبوها
ويشوفها أحلى بنت
لو حتى عابوها
فانتي يامصر بنتي
هبتك هي هبتي
عزك هو عزي
ومرساي وحيرتي
شعبك هو شعبي
من غيره ماقدر أعيش
ولا أحيا بين الشعوب
والفرحة تبقى مفيش
والدنيا من غير هرم
ما تُحترم
ومن غير نيلك حتعطش
والرومي تبقى قريش
من غير نكت مصرية
حنضحك على إيه
من غير قصص مقرية
إيه تاني نبكي عليه
من غير أمثال شعبية
أيه تاني نوصف بيه
من غير قصور وكهوف
ولف مصر وشوف
من غير فخامة وعز
من غير فهامة عالم فذ
من غير حواريكي وشوارعك
من غير كباريكي وترعك
من غير أزهر شريف
ينشر دينا الحنيف
من غير مصري شريف
ولاعب كرة حريف
من غير خفة دم
في عالم دمه تقيل
خلى العيشة تغم
وقابيل قتل هابيل
من غير بسمة شفايف
بتطمن اللي خايف
وتقوله ماتترهبش
من إرهاب المجانين
ده فكرنا ماجمدش
وإحنا أصل ودين
تفضلي أنتي مصر
وإن اتغير زمانك
أو ضاع منك أمانك
أو شهامة ولادك
أو اغتصاب بناتك
إجابة السؤال
مش محتاجة توضيح
ولا كذب ولا ضلال
ولاإني أكون صريح
باحبك على عيبك
وعيبك من عيوبنا
مستحملانا بخيرك
رغم قسوة قلوبنا
وغياب دينا وضميرنا
ونكرانا وجحودنا
اللي يهدوا الدنيا
لكن أنت ماتهدتيش
ولا قدروا عليكي مافيا
البانجو والحشيش
.....................................