هو انت لسه يا بنتي ما عرفتيش

هو إنت لسه يا بنتي ما عرفتيش
*****
هو إنت لسه يا بنتي
ما عرفتيش
إني أنا فاتح
شباكين ع الجار
يدخل هواهم
جوه قلبي يطوف
ويهز ديل الجلابية الصوف
ويسقع القلل اللي ع الشبابيك
يتخض قلبي كأنه شاف عفريت
إوعاكي تنسي بإني فيكي شريك
قايل عليكي وقاري فاتحة كمان
وبشوف عيونك فيلم بالألوان
وإذا كنت جايلك ببقى جاي مكسوف
وأنا فوق حيطان العشق عود لبلاب
بيبان على إني هموت م الخوف
وأنا وسط بوص العاشقين درويش
بفرد عيونك ع التراب سجاد
وأفرد رموشك بطانية جيش
وبلحسة منك فوق رغيف العيش
كأني دالق برطمان شربات
بصلة غرامك جوه قلبي خروف
يا عبيطة قلبي عليكي ليه ملهوف ؟!!
ما يكونش في حاجه ما هيش مفهومه
أو بيننا شىء ولكنه مش معروف
يجبرني وأنا حافي ألف بلاد
وف أخر السكة أنام ع الهيش
أنا عند ظني إن إنت ما أعرفتيش
مركب حنيني ف العيون دوار
بيحط معلقتين سكر ف قلب الشاي
ويخاف يكتر يبقى مش مظبوط
كرباج عنيكي بيلسع المربوط
وساعات بيقرا البخت ف الفنجان
طب خلي بالك للحيطان دى ودان
ودا عيش وملح وعشق ماله شطوط
الليلة هفتح شباكين تانيين
وهلبسك دبله بقالي زمان
عمال أفنن فيها زي ما أكون
على سبحة العاشق بقيت مفتون
وحنيني ماشي يعبق الجدران
الليلة ناوي يكونللي فيكي نصيب
وإذا كنت غربة هبقى فيكي غريب
لكن عموماً قلبي بالتقريب
فى أول صفوف الحضرة سار درويش
هو إنت لسه يا بنتي ما أعرفتيش