حالة عصيان

خلصت زيارة !!

وكنت مغادر..

رايح مكة

واللحظة اللى أنا طالع فيها..

من باب بيوصل لمقامه

حسيت القلب بيتكهرب..

وبيطلع من ضلعه ويهرب

وبيعلن رفضه وعصيانه

أبص ورايا ألقاه متمسمر..

قدام باب الغالى وعبرعن أحزانه

والدم الخارج من مطرح

ما أتقطع م الضلع الأيسر

أصبح دمع..

مغرق كل مكانه

والناس بتنادى تقول يا بنى

القلب اللى بيبكى دا منك؟؟!

أغمض ف عينيه وأفتح

ملقاش صوت الناس ف ودانى

صوتهم كان نابع

من وجدانى

من توهانى خيالى بناه

أحاول ألم الموقف بينى

وبين القلب الثاير

قبل ما حد ما يلمح حاله

" أعقل .. قوم بينا نمشى يا قلبى "

مسيرنا نعود إن شاء الله

ونزور ونسلم ونصلى

ودعانا لأهل بقيع الغرقد

يتحول ف رصيد حسناتنا

نترجى المولى نكون منهم

يحضنا ترابك يا مدينه

تخرج من أجسامنا

هموم الدنيا

ونجاور أهل حبيب الله ونبينا

وأتصبر

أتجمد حبه

جايز مره نشوفه ف حلم

أو نرتوى من إيده بشربه

ف يوم الحمل

ممكن يستقبلنا بنفسه

يأخد إيدنا

يشفع لينا

يدخل بينا الجنه كمان

أنجز.. كل الخلق أتلمت

بصه علينا

المشكله بتزيد ف الحجم

طول عمرى مظبط شهواتك

وكتير كانت سبب الهم

بص القلب عليه

وقال معلش..

الزوار حالهم من حالنا

أوعى تفكر حد سليم

كله بيتخانق مع قلبه

كله بيدفع تمن الغربه

ما بين القلب وبين النفس

بقولك..

أيه؟!

أنت أكيد متأكد إنك عايز تمشى؟؟

مالك..؟!

خايف واقف..

مش على بعضك؟؟

صوتك متحشرج كده ليه؟

عيونك متلونه بدموع

قلبك..

ممكن تسرح بيه؟

آه بتنفذ كل مطالب

ف حاجات دنيا..

مهياش نافعه

الأكثر من ذلك أحيانا

كنت بتغرس

ف الحرمات

ف الشهوات

أرجوك تفهم..

آخر مطلب

عايز تمشى ؟!

أتفضل لكن

أنا حفضل جنبه..

ليوم الآخره..


طريق المدينه المنورة..مكة المكرمة
27/4/2009