حالة هذيان

رغم البيبان المقفولين
رغم الحيطان العالية و الزنازين
رغم الحوارى الضيقين
كل الخطوط المرسومين
ومحددين .. شكل المدى
فى حاجة واحدة مؤكدة
ان الحيطان و يا الخطوط
ويا الحوارى و البيوت
شىء من خيالى .. خوف لاعدى للبراح
لاحسن اتوه ويا اللى راح
مع ناس كتير بره الحدود
لكنهم متسلسلين

يا هل ترى مين فينا حاسد مين
مين اللى واقف فينا يتفرج
باب القفص دمعة عينيه بتسيل
على حد داخل ولا متخرج؟؟؟

فى حد يشبه للاسد فى الطبع؟
ساعة غداه يتقبل المنة؟
ايه اللى يرميه ع المرار و الذل
غير ان ناره فى القفص جنة


ايه اللى يجبر خيل اصيل ع القيد
وبرغم عزة نفسه محنى الجيد
راضى يعيش مركوب و متلجم
ولا انه يصبح فى البرارى السيد

يا كل حد مخوفه حلمه
الحلم لو موصلتوش هتعيش
الحلم حر تموته الكتمة
احلم و قول الحلم ما تخبيش

اجمل ما فى الاحلام
الطيرة و المشوار
و الانتظار للفجر
اجمل من الانوار
و الوقفة قبل العيد
و اللهفة ف المواعيد
و الشوقة و التنهيد
بنحس بيهم اننا عايشين


رغم البيبان المقفولين
رغم الحيطان العالية و الزنازين

لديك حس رائع وتمتلك القدره على

تصوير الصوره الممتده والطرح الجيد .

مودتى وتحيتى ...