شهقة خوف

عادل عوض سند كتب:

شهقة خوف

وانا اللى كنت متصوّر
حنطفى الشوق برؤياكى
ززهر العمر حيفتّح
بلقياكى .
وكان ويّاكى مش بحسب
انا عمرى
وبندم عاللى فات منه
واشوف عمرى اللى جاى لحظه
اعيشها بس ف عنيكى
طويت الارض مااعرفشى
طويتها إزاى
وفرح الدنيا فى عيونى
ولابس احلى ماعندى
وراشش عطرك الهادى
هديه ليّه جبتيها
فى ليلة حفل ميلادى
وروحى سابقه رجليه
وباتخيّل
لخصرك لفّه بايديه
وانا بهمسها فى ودانك
وحشتينى .
وانا جايلك شغلتينى
وصلت لدورك الرابع
ولسّه حادوس زرار بابك
وانا ناسى بإنّك
ساكنه فى السابع
وقفت كتيييير . على بابك
وفيييييين . جيتى فتحتيلى
وشهقة خوف حبستيها
وشفت الدهشه فى عيونك
وزاد الوسع فى جفونك
ورعشة إيد على صدرك
بتفشل إنها تلضم
عراوى توبك الفاضح
وكان واضح
فى تلج إيديكى نار تغلى
دمايا جوّه فى عروقى
دا إنتى ؟؟!!
لأه مش إنتى !!
ولا ده شكل محبوبتى
اكيد خنتى .
وعدّوا لحظتين فى عذاب
رميت جسمى على كرسى
بجنب الباب
وغاب عقلى .. وهيألى
بأنى فى مكان تانى
لكن لأه ..
دا نفس الركن والشقه
على كرسيّه كان قاعد
حبيب تانى
وجنبه شمعدان عاكس
على وشّه
توتر وإمتزج بالخوف
بيتحاشى يكون بينى
وبين عينه
خيوط الشوف
وبيحاول يعيد ترتيب
زراير فى عراويها
ويمسح روج على كتافه
بقع م الصعب يخفيها
بدأ يفرك كفوف إيده
ببعضيها .
وخد شربه من الميّه
وعالترابيزه فنجانه على صينيه
وطفايه ومليانه
وفيها الجمر راح يفضح
ورق مناديلها المرمى
بروج الوانه ورديه
هديه جبتها ليها
بكل الحب اهديتها
عشان غيرى يدوق زيتها
ولذتها .
لكن لذه . ومش ح تطول
ومش ح يدوم
عشان غيرك
ح ييجى ف يوم
فى نفس الركن يتدفى
ويستعفى . عشان يروى
جدور مشتاقه للميّه
وتقعد قعدتى ديّه .
منا قبلك
كفوفى فاركه بعضيها
وازرارى بنفس الرعشه
ردتها ف عراويها
ونفس الروج فى قمصانى
على كتافى
بقع صعبه
لحد اليوم بازيل فيها
فى ساعة دخلة العاشق
حبيبها اللى كان قبلى
وعدوا اللحظتين فى عذاب
توازنه إختل .. ساعتها
رمى جسمه على كرسى
بجنب الباب ...

*************************

عزيزى الشاعر المشكلة عادل عوض سند
ان قصيدتك تبدو لمن يقرؤها لأول وهلة أنها حقيقيه
بكل مافيها من تفاصيل وحكى يصعب على المتلقى تكذيبه
ويالا تلك المرأة التى صورت واقعتها أروع تصوير
والجميل أنك اهديتها روجا وهى اهدتك عطرا ونفس
السيناريو الذى عشته واقعا امام عينيك حدث معك ..
وشرب بطل شعرك المشكلة من نفس الكأس الذى سقي
به من قبله ..
أستاذية فى الصياغة .. ولعل أبرز مافى القصيدة أنك
صورت الخيانه بكل حذافيرها دون حاجتك الى استخدام
لفظة الدباديب ولا الاندر الوير ..
أحييك على قصيدة رائعه كتبها شاعر وزجال مشكلة
وياريت شبابنا يتعلموا ازاى تكون الكتابة من نصك ..
محمود عبد الحليم

الشاعر العظيم الاستاذ / محمود
والله يااخى انت اللى تعليقك مشكله اسلوبك فى التعليق يرفعنى الى عنان السماء .
واتضاءل أمامك فانت استاذى ونحن نتعلم منك . اشكرك على هذه المجامله الرقيقه
ويارب اكون عند حسن ظنك وتكون القصيده اعجبتك . مرورك على صفحتى شرف لى .
اشكرك يا استاذ / محمود .
مع خالص تقديرى واحترامى ..[center]

الاستاذ الرائع المبدع / عادل عوض سند
الله عليك بجد تصوير رائع للخيانه وتصوير اجمل فى بدايه القصيده للمحب بكل صدق وأكيد لو كانت فهمت معنى الحب الحقيقى فى كلماتك مكنتش بصت بره وعلى العموم هى اللى خسرانه
دمت مبدعا متميزا

أخي وحبيبي شاعرنا الكبير عادل عوض صدقني لو قلتلك إني شعرت وأنا بقرأ القصيدة دي إن أنا بقرأ قصة للأديب نجيب محفوظ , ياله من عمل إبداعي رهيب مكتوب كما لو كان سيناريو أنا جالس بشاهده بالصورة بتاعته , وكنت قاعد بارتعش مع كل رعشة في القصيدة , والله انت المفروض تكون شاعر مصر الأول .

اخى وصديقى الغالى الشاعر الكبير
الاستاذ عادل عوض


قصيدة شهقة خوف
قصيدة رائعة
وكانك كاتب سيناريو من الدرجة الاولى
وشاعرية فائقة وصور متتالية وسريعة
نكاد نتوقف عندها بصعوبة
فتجذبنا لقراءتها عدة مرات

تقبل مرورى المتواضع

اختلف
ابويا عادل عوض سند
مش عارف كل ما اجى اقلك ياشاعر يا عظيم يا مبدع يا....الى اخره من الالقاب التى تشرف بأضافه اسمك اليها
القانى بقول يا ابويا
اعزرنى
اختلف مع كل عملاق قال انها مسرحيه او فيلم او روايه او سيناريو
واقول
دى لقطه
master seen
لقطه الفيلم زى ما بيقولوا
خيانه على ورق سلوفان
بلا ابتزال ولا الفاظ جارحه
ولا اى نوع من الاثاره اللفظيه
ولكن الاثاره تاتى بعض الهضم
ايون
بعض هضم الفكره
وشربها حتى اخر حرف اتكتب
اقول يا نهار ابيض
بقى انتا كنت بتخرج المشهد ده
طب الرقابه وافقت ازاى
مشهد خيانه بدون قبله واحده
مشهد نظيف
كان لازم توافق عليه فورا
لكن الجمله دى
عملتلى تربنه
بيتحاشى يكون بينى
وبين عينه
خيوط الشوف
ايه ده
جت ازاى
شوف يا بويا
انا قريت وسمعت جرعه وطن
متوقعتش انى ممكن انبسط تانى وانشكح وانجعص واتكيف من قصيده تانيه ليك بنفس قدر جرعه وطن
لكنى اتكيفت اوى اوى اوى اكتر من جرعه وطن
من رائعتك شهقه خوف
درس لكل طلبه المعهد العالى للسينما قسمى
التصوير والاخراج
تعالوا شوفوا ازاى تكسفوا فكره تنفع مسلسل مكسيكى من 300 حلقه
للقطه واحده فقط لا غير
ابويا
تقبل فائق شكرى وامتنانى وتقديرى واعزازى
دمت بكل خير