يابنت الأيه يا فرحه

يابنت الأيه يا فرحه..عليكي لفة طرحة
بتخليكي زى القمر ..

قمر؟
قمر طلعة للقمر .. ونزلة علي جدور رقبتها ..
يا خبيتها .فرحت فيها عدوتها سعاد..

سعاد؟
سعاد راحت عيد ميلاد ..جننت عقل الولاد
كانت لابسه الجنز الضيق وفوق منه لابسه نقاب
جيباه من جارتها رباب..

رباب ؟
رباب الفرحه فارقتها ..وخطيبها رمالها دبلتها
كان الكدب هوايتها ..ومتعرفش معني وفاء ..

وفاء ؟
وفاء تاهت في الزحام ..من شهر ونص وعام
وجوزها لسه مرجعشي.. من يوم فض الاعتصام
وكل شئ في الدنيا فارقها ..حتي الاحلام..

احلام ؟
احلام نفسها تفرح يوم. وشابت بدرى. من الهموم
وطحنها الزمن بالشوم ..ومسبش ليها أى محاسن..

محاسن ؟
محاسن ياعيني خطفوها.. ولاد الــ ؟؟؟ وقتلوها
وأخدة كل حاجتها ..والخاتم الفلصه اللي حيلتها
هدية عيد ميلادها ..من صحبتها منار ..

منار ؟
قطعت علاقتها بالجزار ..وبتقضيها عيش وخضار
وجابت شهادة استثمار.. من فلوس الجمعيه
وراضيه بقليلها وعايشه .. تحمد ربها كل صباح

صباح ؟
صباح تندب في عينها رصاصه.. من يوم ما اشتغلت رقاصه
إللي تشاور إيدها عليه ..تلاقي الف باشا وبيه
يقولولها أمرى يا جميله..

جميله ؟
جميله استاذة إعلام ..في قاموسها مفيش حاجه حرام
مع اللي طالع دايماً طالعه..ومع النازل نازله قوام
وشايفه كل شئ مباح ..حتي عرض سماح

سماح ؟
سماح في الفصل زى النسمه..مع اللي بياخد منها دروس
والواد ابن سعيد الميت ..بتعامله بحدة. وعليه بتدوس ..
وعايزة فلوس.. علشان تعمل عمليه لبنتها الشاطرة ريهام..

ريهام ؟
محجوزة في معهد أورام.. بتجيب علاجها علي حسابها..
وكل شئ في حياتها تاعبها ..واللي بجد مدوبها
انها مش قادرة تنام ..

وخلص الكلام ..

والمعني كان علي الهامش..ويمكن متشفهش العين
مع بعض أمتي هنتعايش..يا بشر مخلوقين من طين
بيقوله البحر واحـد..وانواع السمك ملايين
بس احنا بشر نوع واحد ..بقينا ليه مختلفين
بقينا ليه قلبنا جاحد ..وعيونا مش شايفين
غير مصالحنا ..ومش حاسين إلا بروحنا
وياريت بعد دا كله ..هنلاقي حاجه تفرحنا..

يابنت الايه يا فرحه ..
يالي عليكي لفة طرحه بتخليكي زى القمر ..

قمر ؟

» يابنت النيـــل....
» الله عليك ياابن بنت رسول الله صلى الله عليه وسلم؟؟
» [] فرحه []
» قصيدة فرحه
» فرحه للنفس