/// حكاية غرام ///

/// حكاية غرام ///
-------
حكايتي معاه
خيوطها حرير
بتغزل فوق جبين العمر ضحكاية
ودى حكاية ،
بَدِت بينـَّـا ف طريق مشيناه
يادوب قلبى بيتمخطر فى دنيا الحب والأشواق
وأول خطوة كات لية ف دروب الآه
لقيت إيده بحنية ، ولمسة رقيقة فوق كتفى
تطبطب ع الجروح فية
تداوى الجرح من جوة وتمسح دمعة فوق خدى
وقبل لما تتحرق اوراق
سرق قلبى وتنهيدتى .. بنظرة عين
سِمِعت نداه
لقيت روحى مسابقانى بتجرى عليه
فتح دراعاته وأخدنى
لقيت نفسى فى حضنه باعيش سنين عمرى
رَسَم أحلامى جوايا بلمسة إيد
كإنى فى عيد
وانا اتمنيت
بإن احلامى تتحقق وتتفسَّر .. ولو لحظة من اللحظات
أتارى الحلم عاندنى ماهوش واحد
دى أحلامى كتير ياما
بتِحبى فوق ضلوع العمر طفل وليد
يعدّى فوق خطاوى الآه
قوام يكبر
يعجـّـز من سنين الحزن
والاقى الآهة ساكنانى
بعيد بالمح ف ضلمة ليلى والتنهيد
شعاع مادد إيديه الاتنين
وفارد قلبه قدامه
خضار للعين
وباجرى عليه .. تدّب اللهفة ف عروقى
ونفضل بالساعات نحكى
وافضفض باللى جوّايا
يخف القلب من حِمله
ورمشى ينام على خده .. وينسى أساه
وفجأة بافوق من الأحلام
ألاقى كابوس محاوطنى
بيخنق نبضى جوّايا
وكان الحلم ويايا
بيسكن جوف غناوى الصبر
يعدّى فوق جبال القهر
وانا المسكين ، وباتعلق ف حبل شروق
يعدّينى لبر النور
أتارى الحبل كان دايب
وأملى معاه ده كان غايب
برغم حضوره ف الأحزان كتير خدته الصديق ليّة
صحيح أوقات يعاندنى
ويهرب من لقايا ساعات
أعيش الحيرة واتوجّع ، وأتعذب كتير ويّاه
لكن ماقدرش أغيب عنه
لأن العشق جوايا نسج توبى ، ومحبوبى ،
رصاص يرسم حياتى معاه
يلونها بلون الحزن والتوهة
وباتلوّن بلون عوده
سواده ضنانى .. برضه ضناه
ونقطة حبر تكتبنى وباكتبها
وفوق اوراقى تتكون حكاياتى
أتاريها بتتمزّع وتتقطّع .. مابين السطر والتانى
حاولت كتير اروح وابعد وأنهى قصتى بإيدى
لقيت الجدر كان مادد وفارد ف الضلوع عوده
صبح مارد
لكن شارد
واتارينى باعيش جوّاه
*******
سامية سلوم