غرام وحنين .. أحمد سعيد موسى

غرام وحنين
.....
..
وبين همسه وبين لمسه
وبين كلمه ضناها الشوق
وبين اللهفه والتنهيد
وبين نسمة أمل رايحه
لشطّ بعيد
وبين توهه ف ليل الآه
وبين فوقه ف حضن الويل
وبين جرحي اللي بالقنطار
وبين مُرّي اللي بالعناقيد
وبين غُلبي وطول سُهدي
ونار شوقي اللي ما بتطفى
وتملّي تقيد
بلاقيني
والاقي عنيكي رغم البعد
رغم الجرح
بتجيني
ورغم انّي بلهفه وشوق
كتير جيتك .. وِحُشتيني
(( وَحَشتيني ))
وبيني وبيني بفتكرِك
وانا الخارج حدود فِكْرِك
ورغم انّك خلاص ناسيه
ببلّ الرّيق على ذِكرِكْ
عشان اسمك ..
بريِّ الحبّ طول عمري
بيرويني
وبحلفلك برغم الويل
وأنّات الهوى الرّاشق
ف تَكويني
أنا لو مُتّ .. وتنادي ....
صدى صوتك هيحييني
ولو أنفاسك الطاهره
تمرّ بصمت فوق منّي
لثانيه ف وقت تَكْفيني
هتحييني .. وافوق تاني
تدبّ الروح ف وجداني
واقوم انده على قلبك
واقول .. سيدي
واروح اعصر سنين فرحي
وأهديلك عناقيدي
وابيع الكون عشان خاطرك
وميهمّش
م قبليّا كتير دابوا ف غرام عادي
وحبِّك مش تراجيدي
دَ لو بايدي
أكون خاتم يزين صابعك
م هتأخّر
ولو بيدي أكون الجنّ رهن إْشاره واتسخّر
م هتأخّر
غرامك يغلي جوايا
وحبِّك مش بيتبخَّر
أنا اللي عشقت اقول إسمك
واصيغ رسمك
وأستنى اللقا بدري
واقول انا جيّ متأخّر
بلاش قلبك يضنّ عليا من نبضه
ويستخسر
أنا الأجدر ...
بإنّي أكونلك الفارس
واكون لعيونك السوده
ملاك حارس
واقول مواويل
تفوق كلّ اللي قال كلمه
- بإحساسي -
وانا في الشِّعر مش دارس
وبعد د كلُّه بتقولي بحبِّك ليه ؟؟
أقولك إيه ؟؟
مفيش ف الحب إمتى وفين
وليه وازّاي
مفيش ف الحبّ أيّ شكوكْ
دنا بْحُبِّك بخطّي الشوكْ
فليه قلبك يكون قسّاي ؟
بحبَّك .. لمّا بسمعها
بترويني
ونظره بسّ من عينك
بتِكْفيني
ولمّا بتطلبي منّي
أقولّك شعر من قلبي
بصيغه من دموع عيني
واقولّك إيه انا وانتي
(( وحشتيني ))
بحبِّك ؟؟ .. قالها قبلي كتير
ف شعر ياخدني ويجيبني
وبتمنى أجيب تعبير
جمالك سحره يغلبني
فاعيد الكرّه من تاني
واسيب الصمت يملاني
واغيب لكن .. مبتقلشي
بدوَّر عن لغه تانيه
واقولك شعر متقالشي
أقولك شعر متقالشي ؟؟

......
..
شعر / أحمد سعيد موسى

أحمد ياموسى
كل عام وأنت بالحب وللحب فارس
تعرف أنا متأكد إنك مش مُدخن. هاتسألني ليه؟ أأقولك
لو مدخن نَفَسك ما يكملش القصدية ولكن تفوقت على نفسك فجادت عليك.
النص فيه كتير جداااااااا لسه أكيد هايتقال.
أحلى عيدية منك ياصديقي
عيد فطر سعيد

علي قابيل كتب:: أحمد ياموسى
كل عام وأنت بالحب وللحب فارس
تعرف أنا متأكد إنك مش مُدخن. هاتسألني ليه؟ أأقولك
لو مدخن نَفَسك ما يكملش القصدية ولكن تفوقت على نفسك فجادت عليك.
النص فيه كتير جداااااااا لسه أكيد هايتقال.
أحلى عيدية منك ياصديقي
عيد فطر سعيد

على باشا قابيل
أنا فعلا بطلت التدخين من زمان
بس بقيت أحشّش بيقولوا الحشيش بيطوّل النفس
والله يا حبيب إنت غالي وخلاص
ربنا ما يحرمني منك
عيدك سعيد يارب
تحياتي

يانهار ابيض على جمال حروفك

بصراحه ملكش حل

وأى أن كان الحب ما أروعه

بين سطورك

لا اجد ما اقوله سوى

ما شاء الله عليك

دمت جميلا

دمت بحب

ملحوظه

تثبت القصده بواسطتى

لروعة المضمون

الشاعرة عزة الزرقانى كتب:: يانهار ابيض على جمال حروفك

بصراحه ملكش حل

وأى أن كان الحب ما أروعه

بين سطورك

لا اجد ما اقوله سوى

ما شاء الله عليك

دمت جميلا

دمت بحب

ملحوظه

تثبت القصده بواسطتى

لروعة المضمون

الله يخليكي يا استاذة عزّه
دا من ذوقك وكرمك بس
وشكرا للتثبيت
عيدك سعيد

بقلك ايه يا احمد انا داخل انهارضة وبقولك
اولا كل سنة وانت طيب
ثانيا كل الى هقدر اقولو
دمت شاعر رائع
دمت بكل حب وابداع
اخوك
تيمو

الابن الشاعر الرائع

احمد سعيد موسى

والله يا احمد وبدون مبالغه . نصوصك كلها فى صياغتها

وتركيباتها الفنيه ورؤيتك الخاصه فى إختيار شطراتها .

تتعدى خطوط القصيده العاديه .

ثقافاتك تنضح بوضوح بالغ على اعمالك فتضيف اليها الكمال

وهنا إبداع لايخرج إلا من شاعر أمسك بخرفيه خيوط الموضوع

فنسج بإقتدار تلك التحفه الفنيه الجميله .

قصيده رائعه وأظن انها تستحق ما كتبت عنها وإلا ماكتبت :

أنا لو مُتّ .. وتنادي ....
صدى صوتك هيحييني
ولو أنفاسك الطاهره
تمرّ بصمت فوق منّي
لثانيه ف وقت تَكْفيني
هتحييني .. وافوق تاني
تدبّ الروح ف وجداني
واقوم انده على قلبك
واقول .. سيدي

الله على جمال التعبير الراقى وحسن التنغيم .

صباح العيد . صباح الخير .. صباح الشعر

تقبل منى خالص المودة والتقدير ...

تيمو كتب:: بقلك ايه يا احمد انا داخل انهارضة وبقولك
اولا كل سنة وانت طيب
ثانيا كل الى هقدر اقولو
دمت شاعر رائع
دمت بكل حب وابداع
اخوك
تيمو

وانت طيب يا تيمو
وشكرا لرأيك يا كبير
تسلم يا حجوج
تحياتي

مش بقولك نيتك وحشه معايا

كل ماخد الناس ناحيه العقل

تجرجرهم مني ناحيه القلب

ويبلطوا عندك 0000

وبعدين معاك يااحمد ياموسي ؟؟

في أقرب قبضه هعترف عليك

وحقول إنك زعيم التنظيم

أمال حخلص منك إزاي ؟؟؟؟؟

ولغايه ده مايتم 000 عيد مع أهلك

عيد سعيد مؤقتآ 00000

قصيدة جميلة جدًا
مُتعت بالقراءة.
لكن العنوان ضعيف إلى حدِ مافى رأيى.

عادل عوض سند كتب:: الابن الشاعر الرائع

احمد سعيد موسى

والله يا احمد وبدون مبالغه . نصوصك كلها فى صياغتها

وتركيباتها الفنيه ورؤيتك الخاصه فى إختيار شطراتها .

تتعدى خطوط القصيده العاديه .

ثقافاتك تنضح بوضوح بالغ على اعمالك فتضيف اليها الكمال

وهنا إبداع لايخرج إلا من شاعر أمسك بخرفيه خيوط الموضوع

فنسج بإقتدار تلك التحفه الفنيه الجميله .

قصيده رائعه وأظن انها تستحق ما كتبت عنها وإلا ماكتبت :

أنا لو مُتّ .. وتنادي ....
صدى صوتك هيحييني
ولو أنفاسك الطاهره
تمرّ بصمت فوق منّي
لثانيه ف وقت تَكْفيني
هتحييني .. وافوق تاني
تدبّ الروح ف وجداني
واقوم انده على قلبك
واقول .. سيدي

الله على جمال التعبير الراقى وحسن التنغيم .

صباح العيد . صباح الخير .. صباح الشعر

تقبل منى خالص المودة والتقدير ...

أبي الحبيب / عادل عوض سند
اشكرك يا أبي الحبيب على هذا المرور المتوهّج
والحضور الراقي والإطراء العذب
وهي حقا تستحق وأكثر
صباحك العطر والأنسام والدرر
أحمد

الشاعر الرائع الكبير

الاستاذ احمد موسى

كلمات ومعانى رائعه تتلألأ

بجاملها الخلاب

سلمت وسلم وابداعك الراقى

دمت مبدعا

وكل عام وانت بأفضل صحه وحال

أحمد موسي ..الاخ والشاعر المرهف الرائع .. لا أجد تعبير يعبر عن مدي متعتي بقراءة هذة الدرة الرائعة المتألقة ..بس ده العادي مع كل قصايدك ..انت كبير يا احمد موسي .. صاحب بصمة خاصة مؤثرة وهذا ما يجعلني واضح في اعترافي دائما أني واحد من أشد معجبيك شغفا بأشعارك .. دمت بهذا التألق دائما ..وبكل حب وخير وسعادة

الاستاذ الشاعر\أحمد موسى

ان لأعمالك لسحرٍ خاص

قلما نجده هذه الايام

تسلم ايها المبدع المميز

ويسلم حرفك الراقي

عيد سعيد كل سنة وانت طيب

م/عطية شواش كتب:: مش بقولك نيتك وحشه معايا

كل ماخد الناس ناحيه العقل

تجرجرهم مني ناحيه القلب

ويبلطوا عندك 0000

وبعدين معاك يااحمد ياموسي ؟؟

في أقرب قبضه هعترف عليك

وحقول إنك زعيم التنظيم

أمال حخلص منك إزاي ؟؟؟؟؟

ولغايه ده مايتم 000 عيد مع أهلك

عيد سعيد مؤقتآ 00000

يا عم عطية هيا الناس ناقصة غمّ
عقل ايه يا راجل وبتاع ايه
ووطن ايه اللي تعبك وتعب قلبك ع الفاضي
شوف لك سنيورة حلوه غازلها أحسن والله
وانت أبو الشباب كله
بس نصيحه متحبش بجد .. اصل نهاية الصراحة ؟؟؟
ص ا ب و نة
محبتي

أحمـــد علام كتب:: قصيدة جميلة جدًا
مُتعت بالقراءة.
لكن العنوان ضعيف إلى حدِ مافى رأيى.

شكرا يا حبيب
أمّا عن العنوان فكتبته نزولا عند رغبة أحد الأصدقاء
ولقناعتي به وهي آراء
محبتي وتقديري
أحمد

تسلم ياغالى

ما اروعك

دمت بحب

» هذا أبي ... أحمد سعيد موسى
» أمي ... أحمد سعيد موسى
» إنهيار ... أحمد سعيد موسى
» راجعه ليه ؟؟ ... أحمد سعيد موسى
» فلاش باك .. أحمد سعيد موسى