فين الرحمه ياخلق اللـــه ..؟؟؟ .. ضياء الدين البري

السلام عليكم .. كلام من قلبي

فين الرحمه ياخلق اللـــه ..؟؟؟

.....

شجرة زيتون
فاقـْده خضارها
يابسه فروعها
واشتّتوا كل الأغصان
فجأه لقيتها ..!
واقفه شريده فْ ناحية جاري
كل ماتبكي تشعلل ناري
وبتزعق بعلوْ الصوت
وبتسأل كل الْ يفوت
ليه يا سْيادي ..؟
سايبنّي م الغوله أعاني
بتشوّه صورتي وعنواني
وقلوبنا بيسكنها أنين
حتي اخواتنا مش سألين
ليه ناسْينّـي .؟
دول عايزنـّي.؟
أحجز درجه فْ قطر الموت .؟
كل الناس سامعينها تصرّخ
وعتابها في القلب يجرّح
أنـّتها شابّه وعفيّه
ودْموعها بتعاتب فيّا
ليه ناسْينّي وحيده ياهوووه.؟
فين الرحمه ياخلق الله..؟
ليه الأقصي هناك سبتوه..؟
جوّا السجن يعيش مأساه

ومّا سمعت نداها جْريت
إتأملت وفجأه لـْقيت ..!
صوره عارفها ، شوفت حبيبتي
هيّا بـْعينها
سر النبض الساري فْ قلبي
جوّا عنيّا الكل شايفها
ومهما الدنيا لعبت بيّا
مهما الغوله طالت مني
مهما حاربني إنـْس وجنـّي
دمي وعمري راح يفدوه
مجد جْدودي مش هنساه

فجأه لقيتها
تشاور ليّا
جريت ناحيتها
يمكن أغيتها
فجأه قالت لي ..
ياريت تسمح لي ..
ومّا احكيلك كل مابيّا
يمكن من قلبك تعذرني
إسمع منـّي ..؟
لمّّا الغوله لـْقيتها مـُصِرّه
تقضي عليّا جرّه فْ جرّه
قلت أكيد ممكن تحموني
غصبن عني هربت وجيت
والْ فاضللي
نبضه وحيده وْهيّا الباقيه
عايشه شريده فْ برواز صوره
وكْـلاب الغوله المسعوره
إتـْربت علي نحت فروعي
بتْـمزّع وبتنهش فيّا
بتمصمص دايما في ضْـلوعي
والجسد الطاهر من بدري
زي السوسه بتنخر فيه
ناويه تخللي الروح تعاديه
متوصّـيّه تقضي عليـه
خايفه لايطرح نبت جديد
يرجع تاني يمد اْديـه
ويقدم لي بواقي الميـّه
تروي النبته الباقيه فْ جدري
ويرجّع نـُصّي المقصوص
يصحي فْ يوم يقدر ينجدني
ويواسي الدمع المحبوس
تهرب مني جروح زنـّانه
يسرح نبضي فْ كل حدودي
ويكبّر زرعي فْ أحضاني
يتربّي ويكبر فْ غـْطاني
تتجـدّد نسْمات الخلد
تجْمع شمل الأمّه التايهه
وتْخضّر أوراقي الخايبه
الناشفه من مدّه وخايفه
الصابره علي ريقها المُـر
النايمه في قبور أنّانه
ممدوده زي الأموات
وكل مانملك هوّا الصبر
وقلوب دايما بي مشغوله
شايله همومي
حاسّـه بحالي
أنّاتها بتـْقوّي صمودي
بتفكّرني بكل عْهودي
دعْواتها دايما جيّالي
ونفوس خايبه كتير نـَسْياني
دايما تبعد
لأ وتهدّد
والدنيا سكناها بجد
تتحكّم فيها الهفوات
نسّـتهم إيه معني المجد
نزعت منهم أي صفات
نسيوا الإسم وفين عنواني
وكإني في الدنيا بليّـه
والغوله تدمّر ف كياني
قايمه ونايمه تمزّع فيّا
بتدّهوس في قـْلوبنا بحرقه
بتبعزق أوصالنا وسارقه
كل تاريخ بيمهّد لينا
أي دليل يمكن يدّينا
حق العوده فْ يوم لولادي
أي قانون بيمد أيادي
يثبت إن القدس بلادي
وبـْتسقينا المر كاسات
والغربان عمـّاله تمـوّت
في العصافيرالباقية تزقزق
بتواسي المسري المدبوح
والغوله مش ساءْله فْ حد
تتربّص وغيلانها تمد
بتخطّـط وبتبني السد
وحمامه بْـتمسك أغصان
بتسبّح بسم الحنان
والْ جسدها كله جروح
بالدمع الساكن في عنيها
بتنادي الأقصي المجروح
واللي مسيرها تطير في الجنه
بعد ماتشكي لـْرّب كريم
من أمتنا القاسيه عليها
سايبه الغوله تقسّـم فيها
والْ يصّرخ بيْشدّوه
وبأمر الغوله أكيد ينْـفوه
إمتي ياناس هنخاف الله .؟

طب ساعدونا فْ شيل الهم
طول العمر نضحّـي بهمّه
وقت الجد يهون الدم
إمتي يا أمـّه تهمّي بذمّه.؟
يرجع حق ولاد العم
شعب بهيّه بيبني الوحده
يحيي مباديء طالها الردّه
حاولي تساعدي كل ولادها
دول حافظين الغوله وعيبها
خير أجناد الكون
شوفتوا الغوله تحاذر منّا
وقت الجد بْنقطع ديلها
ونقصّر ف الدنيا وجودْها
ومّا تكوني ياأمّـه عفيّـه
تبقي فْ قلبي ونور في عنيّا
إحنا أخْدنا إيه م الفرقه
غير الصهد ونار الشِّـده
وانتي الغايبه فين مـُدّه
سايبه الغوله بتلبس توبنا
تسرق منـّا تاج العزه
شوفتي فْ غزه .؟
حاكمه حصارها
وتموّت أطفالنا بْـلذه
وانتي برضه ساكته وبارده
شوفتي الأرض الطاهره بتصرخ
طالبه النجده
ياللا يا أمـّه
شدّي الشـدّه
قبل الروح ماتروح وتْـلخلخ
كل جذور الأمّـه ترخرخ
ويـْموت فينا مجد جدودنا
كانو الأقوي فْ رسم حدودنا
جوّا قلوبنا
ومّـا بانوه
جوّا تارخنا وصُّـوا عليه
عايزين نمحي مين يعاديه
وانتي عارفه كل حقوقنا
ولإمتي تسيبي الغوله تْـلبّخ .؟
سايقه وراها كل الشلّه
جوّا بلادهم برضه تعكعك
وبيرضوها بكل مانملك
باين ماسكه عليهم ذِلـّه
ياتـْهم ذَلّـه
بتمشّيهم بالفرقـلّـه
ويمشّوكي بكل مذلّـه ..؟
إيه العِـلّـه ..؟
داحنا اصحاب الدين والملّـه
إحنا الأصل وهمّ بليّه
إحنا القبله
المحروسه أرض بهيّـه
أرض الصّحبه والأنبيّه
رمز المجد والحريه
شوفتوا ولادها إيه عملوه.؟
لمّا انتصروا بعون الله

وارجع اقولك
والله انا خايفه
لتكون ديـّـه
آخر ندهه
ويْـضيع كللـك
أصل انا شايفه
نجم الليل هربان من همّـك
والحريّه من طول ليلك
نسْـيت كل ملامحي التايهه
بُعدك نار بتشعلل فيّا
بتزوّد ف عْيوني الضلمه
بتسوقني ف السكـّـه العاميه
وبترسملي طريق الموت
تعبنا ياناس من كتر الْ آآآه
شبعنا مرار والعقل اهو تاه
فين الرحمه ياخلق اللــه ..؟

.........