بحبك يا غزة

يا حبيبتى يا غزة
كل يوم بتزيدى عزة
نفسى أجيلك وأرجعلك تانى
وأخد ترابك فى أحضانى
وأجى لبحرك يهزنى موجه
زى ما حبك هز فى كيانى
يوم ما سبتك كان يوم بكا يوم دموع
يومها إتمنيت من قلبى الرجوع
يوم ما أفتكرك القلب يعلن حزنه الطويل
والعقل يفتكر لحظات الرحيل
يفتكر سلامات الحبايب والقرايب
ساعتها يوم ما كان الدمع غالب
يوم ما إدينا أمل لنفسينا بالرجوع
عشان نوقف دمع رافض الخضوع
ونبتدى نفتكر لحظة بلحظة
وكل مكان مرينا بيه فى كل لحظة
أفتكر آخر أكلة جمعتنى بقرايبى
وآخر ضحكة معاهم كانت من أعماق قلبى
عارف يا غزة إنك زعلانة منى
ومش هادافع لإن إحساسك مش ظالمنى
بس الرحيل مش قرارى
دا أنا إتكويت من شوقى ونارى
أنا فاكر لحظات الطريق
ساعتها مريت ببحرك
وحسيت إنى فى حبه غريق
كان موجه ثاير كأنه بيقول إرجع
ورغم إنى فى حبها طاير
قلتله مش هاقدر أرجع
هى مش حبي الوحيد
فيه بلد تانية حبي ليها شديد
بلد عمرى فى حياتى ما شفتها
ولا حتى مشيت على أرضها
دى أرض الوطن وهي الديار
دى أرض الحب وهى الإختيار
جمالها مفيش كلمة توصفه
وسحرها مفيش قلب يستحمله
اسم الأرض يافا الجميلة
وحبها عايش جوايا من سنين طويلة
نفسى ترجعيلنا تانى يا فلسطين
إحنا من غيرك ضعاف وتعبانين
من غيرك إحنا جسد من غير روح
من غيرك أنا موجوع ومجروح
ببكى عشانك بدل الدمعة ألف
ومن غيرك الدنيا عمالة بيا تلف
العزة الحقيقية كانت على أرضك
ومش بشتاق لنصر غير نصرك
يا قدس نفسى أعدى من بابك
وأسجد سجدة فى رحابك
يا كل فلسطينى فى الدنيا بحالها
والله أرضك ما فى بجمالها
عيش فيها تعرف معنى الخير
وتعرف معنى حب الغير
تعرف معنى الأهل والإخاء
تعرف معنى الحب والإنتماء
تعرف معنى العزوة وأهل بجد
تعرف معنى حد بيخاف على حد
مهما حصل مش هاسيب أرض الجدود
دا صوت الأذان فيها يسوى الوجود