أنا مش هموت تاني

شعر: سلمان حسن علام

مسكين أوي اللي الوطن ما مدلوش إيده
خلى الظلوم الردي فجأة بقى سيده
ضيَّق عليه فـ لقمته.. نكد عليه فـ عيده

كتب عليه فـ مِحنته:
يَيْذله يَيْسافر
قلبه البريء اندهس
وطنه..
وطنه بِمِية حافر
لو فرض حب الوطن يمكن يموت.. كافر

لو فرض حب الوطن راح اعمل ايه يا رب
لما اتظلم واتسجن واغرق فـ بِرْكة سب
وان قلت يوم كلمتي..عمري الوحيد.. يِنْكَب

وابقى شهيد الوطن..
وابقى شهيد الوطن وأموت وانا العايب
اللي يحب الوطن ولاَّ يثور.. خايب
لما الولد يندفن راح يعمل ايه الشايب
------
أنا.. أنا الشهيد اسمعي
أنا قمت من تاني
إبكي أو اتوجعي
أنا مش هموت تاني
خدتك فـ حضني زمن
مزَّعت أحضاني
ودفعت وحدي التمن
وِفْرحتي بالجاني

كَلْتي شباب الشهيد
وعصرتي قلبه عصر
بينادي اهه من بعيد
وبيسألك: ياااااا مصر..
ليه المصاب من سنة..
واقف أمام القصر؟!

ليه القتيل اتقتل وتبرئي الجاني؟!
عاوزه نظام "الجمل" يطلع لي من تاني!
لو تعملي لي عمل.. واخدك فـ أحضاني..
هاحرق شيطانك.. واموت
وابقى شهيد نَفسي
ده انا مت جامد أوي .. والعيشة كات نِفسي
بس انت قلبك حجر.. بتبيعي وبتقسي

نيلك.. نيلك مرار.. ارجعي..
وطِّي اشربي منه
وطي اشربي واشبعي
من حزنه.. من أنُّه
نيلك .. نيلك رفيق غربتي
ما انا حزني من سِنه
----------
سِبت الطَّبور.. اندفعت.. طلعت ع الميدان
بِعْنَيَّ شفت الجنود رصفوا الطريق.. أبدان
القسوة كات فـ الزناد..
أجساد.. أجساد بلا وجدان
لمِّيت.. لمِّيت شقى اللي اتقتل
وفـ جيبي اهه.. شوفيه:
نازل عشان لُقمته..
يفرح قوي.. لو فيه
بتخبي إيه؟!!
طلَّعي..
إشمعنى ده بتخفيه؟
علشان ده حَبك.. لوحدك..
نازل عشان مهموم
مهموم بماضي.. بحاضر..
مشغول ببُكره اليوم
فتح دراعاته..
ضمِّك
يامُّ البدن.. مسموم

أمه وابوه اليتامى..
أمه وابوه اليتامى بعده بيشكولك
يا لابسة توب القَيامه
مين.. مين نسجهولك
إبكي.. إبكي ومش هسمعك..
ما انا لسه مجهولك..
قال الزمن كلمته.. وهتفضلي بـ طولك

أنا.. أنا الشهيد اسمعي
أنا قمت من تاني
إبكي أو اتوجعي
أنا مش هموت تاني
خدتك فـ حضني زمن
مزَّعت أحضاني
ودفعت وحدي التمن
وِفْرحتي بالجاني

هتلاقي مليون شبح
من كل شاب اتدبح
من أب صوته اتنبح
بيقول معاش ولدي

بلدي؟!
بلدي ومش بلدي
بلدي ونَسياني
تفحص معاشي سنة
وانا.. وانا مت عمياني
تحبس مصاب لو نطق
وتبرأ الجاني

بعتب عليك انما
في الأصل انا العايب
اللي يحب الوطن..
ولاَّ يثور خايب
لما الولد يندفن..
راح يعمل ايه الشايب!!

الله الله الله كلماتك جميلة جدا جدا جدا

معاني رائعة

واحساس عالي بمصر وما يحدث فيه

سلمت يدك

شكرا أستاذة سلوى. هذه روح طيبة من شاعرة متميزة مثلك

» عالم تاني
» أنا مش هموت
» ~~ من تاني ~~
» شوفتك تاني
» ما تحلميش تاني