مملكة المزيفين

إهداء

إلى روح الأب والمعلم (يوربيديس)

.....................................



(ميديا)



فكرة الهروب اتحققت خلاص

وفكرة العبور للناحيه التانيه

اللى عند مدخل الجحيم

لأول مره أحس مشاعرك مبالغ فيها

وانتى يا دوب عرافه ع القد

لو شفتى مستقبلى المراهق

برضه مش هتقدرى تغيريه

السما بعد نتش المواعيد والغيبيات

وحيز المكان والزمان الضيقين قوى علينا

روح إنستازيا قويه

ومحتاجه عزيمه من نوع خاص عشان تقدرى

تدخلى جواها

والخير مش بيمشى على ضفة نهر

كسيح

بس ممكن يمشى على طراطيف صوابع الأمل

بعد ما يفقد تقريباً نص مقدرته

على تكوين الإراده والوعى جواكى

روح إنستازيا قويه

ولو بتحبينى يبقى كل القضيه محسومه

لصالح الفراق

وتفكيك المعانى المعقده لمعانى أسهل منها

أوصل بعدها لدرجه من التفاهه

إنى أقول لك بحبك وخلاص

بس للأسف

ساعتها تكونى ف القبر اللى حفرتيه بإديكى

وبإديا

روح إنستازيا قويه

ما اقدرش اوعدك تانى واخلف معاكى

عشان كده بطلب منك تسيبينى شويه مستمتع

بالمرمغه ف بلاط الحياااااااااااااااااه



(إفجينا فى أوليس .. إفجينيا فى تاوريس)



على امتداد الرؤيه

شايفك وانتى واقفه تكسرى التماثيل الملهمه

وتحدفينى بطوبه من اللقا المفتعل

وانا واقف بتسكَّع على ناصيه يوريبيدس

الحكيم صاحب المقام

أبو عمه مش يونانيه ومش عربيه

أنده لك .. إفجينيا

فى البحر الأعظم من الوهم اللى ارتبط بمشاعرنا

مشاكلنا وأحلامنا المشتركه

الحبل اللى ممكن فعلاً أصدق إنه رابطنا ببعض

الحكايه والراوى

والقالب اللى فرض علينا شكل لحياه مالهاش وجود

من الأساس

_

جاهل والا مش جاهل ؟



_

لأ مش جاهل

بس عندى إحساس إنى مش متزن

ومش قادر أوصل لفكرتك ف الرحيل

بتألم بشكل مستمر

وبشكل ساخر تماماً من نفسى

أخرج من زمنى

وأفتح كتاب عن مفهوم الديلارتيَّه ف علاقتنا

وكتاب عن المشاعر العابره للنوعيه

أكسر تابوهات الروح

الدين

السياسه

السريـــــــــــــــــــــــــر

المبتسم للحياه ف أتعس اللحظات وأكترها خيبة أمل





(فيدرا)



الغيره

عمرى ما شفتها بجد على أى أنثى

بس ممكن تتصنف على إنها دوافع

زى الشك والفضول

زى الحرب والجرى ورا الأساطير

والتفاؤل أحياناً

الصلوات الحيَّه والنذور الغريبه

والأحاسيس المتشابكه هيا اللى بتعمل مننا بشر

وبتعمل من السفاحين آلهه

الأحاسيس المتشابكه

والحكمه الفارغه أوى هيا اللى بتفرَّق مسرح يوريبيدس

عن شخبطات وتفاهات وليم شيكسبير

والجمل الإعتراضيه ف وسط ما تغرز حواجز اليقين

فتبيت على رفوف البنات المشعوذه

فيدرا

أسمى مراحل الشعور بالذنب والإكتئاب

الإنتحار

الدنيا دى مغشوشه ع الآخر

والأفكار دى مغشوشه

والحياه مزيفَّه

لدرجه تخلينى أهرب منها حالاً

نفسى أهرب حالاً

..........

يوريبيدس

أفتح دراعاتك وضمنى

للعالم الواسع