المواطن اي

في احدي ليالي القاهرة يوم 25 - 1 -2012
كان المواطن المصري يمر بإحدي الشوارع الراقية الهادئة ولسوء الحظ علي قارعة الطريق المظلم كان هناك بلطجي واقفاً
فقام البلطجي بمهاجمة المواطن بمنتهي الوحشية وقال : ابرز يا خفيف بكل الفلوس اللي معاك يا سيد امك
فرد المواطن وهو مذعور جدااا : من غير شتيمة كل اللي في جيبي عشرين جنية وجيبي التاني 2 جنية
فقال البلطجي : خلي الـ2 جنية دول مدفين مكانهم , مبشلش فكه

ثم خطف البلطجي الـ 20 جنية ونظر إليه باستنكار وقال : 20 جنية دي شكلها ولا كأنها طالعه من بؤ كلب , ثم أكمل كلامه بعصبية شديدة وقال : طلع ياااااااض موبيلك
المواطن بمنتهي الاستسلام والخوف : خد يا باشا
البلطجي مندهشا : إيه ده "نوكيا 3310" لا يا خفيف ميلزمنيش , عيب في حقي إني امسكه اصلا , واقلع الجاكت اللي أنت لابسه دا ياااض
المواطن بخوف : اهووو أتفضل لسه شاريه من 3 شهور من "التوحيد النور" بـ65 جنية
البلطجي نظر اليه بمنتهي القرف وقال : دا جاكت دا وحتي جزمتك شكلها يقرف , وشكلك كمان مش مريحني وريني ياض اللي في جيبوك

فوضع البلطجي يديه في جيوب بنطلون المواطن لتفتيشه
البلطجي : إيه دااا
المواطن : دي رجلي
البلطجي مستعجباً : حتي جيبوبك مقطوعة !!!!!!

فاشتعل البلطجي غيظاً ونظر إليه باحتقار وقال: أنت شغال إيه يااض وريني بطاقتك
فأعطها له المواطن بكل استسلام وانكسار
فقال البلطجي ضاحكاً : يا نهارو أنت مدرس ... يعني بتاع دروس
المواطن بذعر : لا أنا مدرس ألعاب والله
البلطجي : ياااض دا شكلك ميجبش حتي كوره شراب وايه اللي جابك في الشارع دا
المواطن : اصلي الصبح مدرس وبعد الظهر كاشير في سوبر ماركت اللي في أخر الشارع
البلطجي : يعني بتشتغل شغلنتين وكمان مفلس وعدمان
المواطن : اعمل إيه اكتر من اني نزلت الثورة واعتصمت
البلطجي ... هأاو منا نزلت برضه يا خفيف بس اللي سبق اكل النبأ
وال إيه شكلك وأنت جاي من بعيد أفندي وعليك القيمة وابن ناس وقلت هعمل مصلحة جامدة واتضح ان كلك علي بعض ميساويش 100 جنية

فزنق البلطجي المواطن ورفع سلاحه الابيض في وجهه وقال له : يعني ضيعت وقتي وكمان مش هطلع منك بأيتها مصلحة , انت اللي زيك ليه عايش في الدنيا دي .... انا هريحك منها

وهنا استيقظ البلطجي من كابوسه المزعج هو يتنفس بصعوبه وقال اعوذ بالله من الشيطان الرجيم الحمدلله طلع كابوس
ثم قام مسرعا من علي فراشه ليتجه لوالده البلطجي الكبير وقام باحتضانه وتقبيل يديه ورجليه وهو يقول له : ربنا يخليك يابا ان مدخلتنيش مدارس ولا كليات ولاخلتني ال ايه افندي محترم بتاع شهادات