حال الدنيا

موضوع: حال الدنيا الخميس أبريل 05, 2012 11:41 pm

مش كل حاجة بنقدر نقولها ونحكيها
ولا كل حلم بيبقا حقيقة نعيش فيها
بنتخيل ساعات قصور مبنقدرش نبنيها
وساعات بنقدر نحقق امانينا
وساعات بأدينا احنا نرميها
واحيانا لما الحياة تبدأ مرة تصاحبنا
يحلف علينا القدر مليون يمين نعاديها
هى الدنيا كدة مهما هتعمل عمرك ما ترضيها
ارضى يا قلبى بالنصيب ،انسى ونسيها
ولو مش بتعرف تقسى علمها وقسيها
ماهو حب مش مقسوم ولا لك نصيب فيها
حرام تخدرها بوهم وعلى صدمة تحييها
حرام تعيشها فى حلم وكابوس يصحيها
وتبدأ حكاية حب وفى لحظة تنهيها
واللى يفضل لها غنوة تغنيها
موال حزين وكام كلمه تواسيها
وجراح كتير مفيش دوا يداويها
ويموت القلب يا حسرة وفيه احنا نعزيها
ونفضل عايشين فى دوامة
من جرح لجرح بنلف وندور حواليها
مدينة وسكانها اغراب تايهين فى اراضيها
مركب فى وسط بحر ما تعرف مراسيها
احنا كدة فى الدنيا ريشة
وكل نسمة هوا تجيبها توديها