قلب الوطن ......

قلب الوطن
= = = = ==

قلب الوطن مجروح
يا مين يداوي الجرح
و قولولي فين و أنا أروح
و أرجع معايا الفرح

قلب الوطن موجوع
و الاهة مكتومة
ايه يا تري الموضوع
م تردي يا حكومة

كان صوتنا مش مسموع
و الكلمة مفطومة
الحلم كان ممنوع
و صحينا م النومة

قلب الوطن متشال
و الفرحة و الضحكة
اتجمعوا الأندال
بيقسموا التركة

قلب الوطن بيدق
و ترد فيه الروح
يطوي الضلام و يشق
ما يهمه أي جروح

قلب الوطن لو ضاع
يا اللي أنتوا بايعينو
كلامكو زيف و خداع
و الصدق مانعينو
فاكرين رميتوا الطعم
و ان احنا بالعينو

قلب الوطن نابض
بالثورة في الميدان
مين باع و مين قابض
بكرة أكيد هيبان

أشرف البنا