تاه الوطن

يامسلمين

إستغفروا

طول الظلام اللى شاققكم ف البدن

من غير وطن

الصبر فين

العدل عارف سكته

ولاحد يوم هايسكته

كل الحقايق تنكشف

من بين فواصل عقلنا

والعقل فين

راح مننا جوه الدما

لما استبحنا دمنا

للظالمين

وسماسره حاضرين المزاد

جوه المزاد

بيبيعوا حته مننا

والحته تنده ألف حته ف البدن

يتجمعوا

رافضين ف لحظة يسمعوا

جرس المزاد

من بين شفايف تنطقه

خطين هنا جوه الرموز لا ينتهوا

إيه اللى فاضل مننا

واحنا اللى فينا مسلمين

ومسلمين

ف ساعات كتيره مننا

لا تعترف

تاه الاعتراف جوه الحروف

من شده الخوف الذى قطع النفس

عايش سكات

أمتى الخلاص من بين حديد

يطلع لنا الفجر الجديد

يفصلنا من بين الفساد

ف المفسده

ونحس لحظه إننا جوه الوطن

لما ينادينا الولاد

كل الولاد اتجمعوا عايشين حياه

لاتنتهى

والعقل ف التفكير

بيسبح ف الفضا

يا ربنا

مملوك أنا

وانت اللى مالك أمرنا

راسم طريق أخره الفراق

راح ينتهى ف يوم الحساب

وقت الحساب

يبدأ ف سرد الأسئلة

والأسئلة إجابتنا ليها

ساعات تكون متعثره

لكن أكيد وبرحمتك

حاسس أنا

مش هاتنسى

من بين روايح جنتك

ألمح حياتى بتبتدى

لحظات فرح

تخشى ف يوم أن تنتهى

بنهاية التتر الذى أخره ف أيديك