الحرف بينزف جوايا

الحرف بينزف جوايا
بقلم
آمال محمود كحيل

الحرف بينزف جوايا
لكنه ما زال زي العصفور
بيرفرف ويطير في سمايا
وانا زيه ف دايرة
حزني بادور
والأوراق عطشانة لدمي
ولنبض اللهفـة المتحني
بدمعي المقهور
ولبوح القلم المتشنج
في صوابعي شهور
ولدفقة أحاسيسي النايمة
ف سرداب مهجور
والحلــم بيسكن شــــرياني
وساعات بيتمتم في كياني
وبيلضم
في حروف ، ومعــــاني
وبيرسم من تاني لقلبي
جنات وقصور
يا أنين الغربة المستوطن
جوايا دهور
ويا وجع العمر المسترسل
وتمللي يثور
تضاريس العمر اللي اندفنت
وسط الأحزان
ضاعت خارطتها ومش فاضل
غير الأوهام
وزهور الصبر الدبلانة
وقلبي المتهان
ودموع القهر المتحاشة
وبقالها زمان
وجيوش الضلمة اللي اغتالت
أجمل أحلام
خنقت في عينيه أمل ونِّس
قلبي الحيران
يا سنابل حزني العطشانة
وجرحي السهران
ويا صبري المشنوق على بابك
بحبال الصمت
ويا دهشة احترت ارسمها حروف
وانسجها سطور
يا بلابل شوق
خلفها الكبت بدون جناحين
ما كفاية أنين
يا سؤال مبتور خليك مسجون
محشور في الزور
أنا رايحة لفين
أنا جاية منين
ولإمتى ف سكة حيرتي أسير
تجاويف الغربة ال جواها
أنا تهت سنين
لساها بتبلع أيامي والريح تنُّور
مقاديف الرحلة كسرها الموج ،
ولا عدت باشوف
وبادور على بر يشيلني
أو طوق لنجاة
والضلمة بتغرز جوايا
مسامير الخوف
وهدير الموج
صم وداني وكرر ماساة
جدد أحزاني ومانطقتش
ولا قلتش آه
هاختصره ازاي وجعي بكلمة
أو صرخة ويل ؟
مش فاضل غير برواز صورتي
وملامحي طشاش
واليأس معشش
في خلايا الجسم المشلول
أنا نفسي اهرب من نفسي ومن
سجن الأحزان
وابعد عن كون ما بقيتش باشوف
فيه سرسوب نور
مين اللي سرق
من عمري الضي وطعم الفرح
مين اللي غدر بي
وبخيانته اتسببلي بجـرح
مين اللي استهتر بعذابي
مين هد الصرح
مين غيرك ياللي ما بيننا بنيت
ميت مليون سور ؟
الحرف بينزف جوايا
لكنه ما زال زي العصفور
بيرفرف
ويطير في سمايا
وانا زيه ف دايرة
حزني بادور
وانا زيه ف
دايرة
حزني
بادووووووووور

الله عليكي ياشاعره

كلمات ولا اجمل

تثبت بواسطتي ... تحياتي

الله .. الله

الشاعره الجميله

آمال محمود كحيل

انتى شاعره رائعه وتتمتعى بالنفس الطويل .

وتلك مقده قلما نجدها فى شاعره .

مع اجادتك الواضحه فى طرح الفكره والمضمون واجادة البناء القصيدى

والتمسك بالوزن الذى اضاف للنص موسيقى الشعر المطلوبه .

احييكى على نصك المفارق الذى راقنى بالفعل .

تحياتى وخالص تقديرى ...

نص جميل يدل على شاعرة رائعة
متمكنة حساسة رقيقة قوية
بداخلك اكيد الاجمل الذي ننتظره
دمتي بخير
تقبلي مروري

غنيوة جميلة جدا

تسلم الايادى

الششاعرهامال كحيل
نو رت المنتدى اختنا العزيزه
و تشرفنا بك وبحرفك الرائع
اهلا بك وبموعد مع الحرف الرراقى و الكلمه الهادفه

» جرح الكروان بينزف
» جوايا كلام
» ثورتي جوايا
» تار جوايا "محمود رمضان"
» سيف الحرف