تحية للميدان.....فى الذكرى

بخفة دم مصرية
ثورة بالملايين
شافوها عصرية
قالوا متحضريين

بيضاء وسلمية
غير ثورات ثانيين
الثورة الصبحية
الليل ف البيت نايمين

وجمعة بعد جمعة
نتجمع ف الميادين
ومن خمسة وعشرين
والشباب معتصمين

لافتات وهتافات
وعبارات للثائرين
تطالب بزوال اللعنة
بطريقة المصريين

واحد بيتمنى رحيله
إيديه م اليافطة
موجوعين
والثانى يروح لمراته
عشان لسه
متجوزيـن
وده عايز يستحمى
زى البنى آدميين

وواحد رسم مطار
وطيارة بجناحين
واللى ممكن يروح
بس بمليارين
ولما غار وروح
كسروا قلتين

وإنت جامد ومتين
ياأبو الميادين
صلب وصامد
وساحة للمظلومين

بالدم طهروك
الشهداء والمصابين
وإتحمى فيك
شباب مسالمين

عالخيل والجمال
أندال بالسيوف هاجمين
بس هس.... يا بغال
إنتوعلى فين رايحين

ده أنا أبوالميادين
وإنتم حثالة متأجرين
بلطجية الحرامية
اللى كانوا حاكمين

كل ده ياملاعين
ولسه مش فاهمين
إحنا ف زمن جديد
مافيهوش مغفلين

أسيادكم حاتتجرجر
ع السجون مكبلين
وريسكم حايتزرزر
لما يشوف محققين