إعلان هام لوظيفة خالية

إعلان الترشح لمنصب.......
...... رئيس الجمهورية
(2)

عايزين رئيس لينا
يخلص مدته ويهوينا
و ما يرازيناش
كفاية كده علينا

رئيس مش عميل
يراعى البلد ويراعينا
لا أمريكا ولا إسرائيل
يتحكموا فينا

ويحكمنا من هنا
مش بريموت من سينا
أهو منه ينورنا
ومنه يتونس بينا

يسمع الكلام يوزنه
وقبل مايرد يفكر فيه
مش تنتهى مقابلته
تطلع النكت عليه

رئيس قد كلامه
ولازم نحاسبه فيه
مش كلام ف الهواء
وإحنا ندورعليه

لايخاف لومة لائم
والحق يحطه ف عينيه
مش ع الضعيف يتلائم
والغنى يطبطب عليه

حاكم عادل ورصين
يحترمنا ونتباهى بيه
عمره تحت الستين
مش حانقعد نداويه

مالوش عيال رجال أعمال
ومراته ف البيت تراعيه
يرجع لوقام زلزال
مش لما المنح تناديه

خيره فى كل مكان
والناس تتبارك بيه
مش فى كل صلاة وآدان
من قلبها تدعى عليه

يعرف قيمة البلد
اللى الحاكم ليه
مش يطمع الولد
فيها وفينا وفيه

البلد دى لها صاحب
ماحدش يقدرعليه
ياأخد عظة من سلفه
وما يستهترش بيه

أستاذى الشاعرالجليل
م \عطية شواش
بعد التحية

تفتكر
نقلل مواصفات
الصنف المطلوب
ولا نلغى الطلبية
مع أطيب تحياتى

الشاعرالكبير
أحمد رجب معيط

شكرا لمرورك
ورقيق كلماتك

كل التمنيات
بالتوفيق فى حياتك