جوه ميدان

بسم الله الرحمن الرحيم

كتبت بعد الاعتداء على المعتصمين
وقبل اقالة د / شرف


{{ جوه ميدان }}



جوه ميدان
اولاد شبان
جدعان عرسان
فرسان احرار

باسترجال
وبهاء وجلال
ويا استبسال
وبكل فخار

رفضوا السوقه
وحكم الجوقه
وقالوا مدعوقه
وثيقة العار

جاحده ظلومه
ومش مفهومه
واه يا حكومه
واه يا حوار

بعد م ثورنا
وشقشق نورنا
وعم كفورنا
الفرح ودار

بعد م قولنا
هيغزل نولنا
خيوط مأمولنا
بدون اعذار

فجاءة لقينا
وصاية مشينه
بتخنق فينا
وبا ستنفار

طالقه سهامها
ومر آلمها
وفارضه لجامها
على الافكار

والداخليه
يا أما خفيه
يا أما عفيه
على الثوار

طالقه الموت
دهس ونبوت
ونيابها تفوت
فشر الحفار

والاعلام
لساه اوهام
بيرص كلام
كدب ومكار

عن توجيه
او شعب سفيه
وبتلعب بيه
دنيا الاقدار

وكأننا
مش مسموح لنا
يصبح فكرنا
له صوت وقرار

وعشان كده
لبينا الندا
فى ميدان الفدا
وبدون انذار

صرنا جموع
تهتف ف ربوع
بلسان موجوع
وبصوت هدار

مش راح نرضى
ف يوم بالفرده
ومش راح نهدا
وباستمرار

راح تلاقونا
على اللى بلونا
حراب مسنونه
ف ليل ونهار

نغضب ننزل
نعرق نبذل
نخلع نعزل
ناخد التار

نكسر يد
كلاب تتمد
ونصبح سد
ما يوم ينهار

نمحى جحود
عهد النمرود
ونصد بارود
طالقاه اشرار

نكسر ناب
تعابين الغاب
ولا نخشى حساب
ولا نرضى فرار

نرفض اى
تراجع نى
يخلى الجى
مرار ف مرار

نطلب حزم
وحل بحسم
ويبقى العزم
شديد جبار

نمحى الخوف
نترص صفوف
نهتف بحروف
تكوى الفجار

نعزف شوق
لوطن معشوق
على نبض عروق
مش ع الاوتار

ننسى اوان
و زمان خوان
ونعود بأمان
شجعان اخيار

ننشد نور
مصرنا بحبور
وبقلب فخور
ويا استبصار

نرجع ناس
رافضين ننداس
ولا يوم نتساس
بحديد او نار

يبقى الغد
ساعتها بجد
براح يتمد
بدون اسوار






تمت




محمود قطب محمود