نخلة وقَناية وخروف ومِعزَة

نخلة وقَناية وخروف ومِعزَة
وشوية برسيم ف غيط ووِزَة
جة كلب إبن كلب لَبَد ف العِشَة
قال أنا حارِسكوا أبقى رئيسكوا
ح قعُد فى الضِلَة أنا والمُوزَة
******************
خَلِف الكلب من العـدد أتنين
كلب أبيضانى وكلب أسمرانى
لِعبوا فى الغيط وعَـدت سنين
بدأ الخروف والمِعزَة تِعانى
جَفِت القَناية م العُشب المَتين
والنَخلة الشامخة صبَحِت عاجزة
*******************
وف ليلة شِتا وف عِـز البَرد
إنتَفض الخَروف من قِلة الأكل
قال كلمة للمِعزة نِحُط يَد ف يَد
ومعانا الوِزة على الحارس النَدل
راح نِهِد العِشة باللى فيها يتهَد
بِعمل حُفرة عشان تِحصَل هَـزة
*******************
إتَفَقُم وراحوا على ميدان العِشة
قابلهُم أنـفـار جـاية م العِـزبَة
كام واحد ماسِك ف إيدية مَقَشَة
وكام واحد ماسِك ف إيدية مَرَزَبَة
واللى شايل فاس ف جبينُة كام نَقشَة
واللى شايل جَزمَة خِرومها بارزة
*********************
كُلُهُم مع بعض فى نفس واحد
قالوا للحارس ياحرامى يانَـدل
أخرُج من هنا مانتش قاعِـد
عُمرنا ماشوفنا معاك العَـدل
إنكَسَر الخوف مبَقِناش نتباعِد
ح نضَحى بروحنا ف سبيل العِزة
*********************
وإنسَحَب حُراسوا ووقِع فى الفَخ
مابقاش لُـة حـيـلة قـًدام العـالَـم
ورصاصة من هـنا قـُناصة بِطـُخ
فى عـين أو جبيـن شعـب مِسالِم
ورَفَـض الجـيـش لـلنـار يـرضَخ
ماحـَبـِش يـفـتَـح نـاروا بالـبـِزَة
*******************
وبعـد كـام خِـطـاب ومِنَاورة
أنا مش ح رشح نفسى للرياسة
راح أفضل قاعـِد دى أخر مـَرة
أنا مش ح ورث إبنى ياساسة
إنتفض الشعب فى عـِز الثورة
من بعـد موقِعة الجَمَل الفَـازة
******************
وفى يوم حِداشَر فبراير بالليل
إتنحى الريس قال مش ح كَمِل
اللى قال خِطابة عـنة الجـميـل
نايبُة اللى إختاروا هو الأول
بيان رئيس الجمهورية الأصيل
قـَرر التَنَحى ودى كانت جايزة
*******************
هـَلِل الشعـب لنجاح الـثـورة
خَرجِت الملايين شوارع مَصر
الكل مش مصدق إن مصر حُرة
وإنـة بيُقـطـُف ثـِمَـار الـنصـر
الكـل بيحلم يشوف فى بُكـرَة
مَـصـر بتـتـقَـدِم وديماً فـايزة
******************
شعر : يوسف أبو زينة
19 / 5 / 2011 م