بلدنا يا بلدنا

بلدنا.. يا بلدنا... يا أصيلة
خدوك كلاب رهينة بين أيديهم
سنين عدت وليلة تجر ليلة
ساقوكى عذاب وكم هونتى عليهم
.........................................
حرام ف حرام بياكلوا كل زادك
لا شبعوا ف يوم ولا نامت عيونهم
لا شافوا يوم ولا حسوا بولادك
وبعد سنين أهى خابت ظنونهم
.....................................
ف يوم أبيض وكان الجو نادى
طلع فرسان على قلب المداين
رجال شجعان ونادوا تعيش بلادى
زهور تفتح قلوب كل الجناين
.................................
وبعد الكر بعد الفر بينهم
وبين اللى نسى رب الخلايق
أراد الله لصوت الحق يعلا
وتتوسع خلاص كل المضايق
.............................
وعدى الليل ومليون ليل يعدى
ما دام أحرار ولادك يا بلادى
لا نبض يموت ولا الخطوة تهدى
لحد ما تيجى وتقولى ولادى
................................
ده كان القول على لسان اللى حبك
لا خافوا فلول ولا ديولهم هابوها
ولما حسوا تعبك كانوا عندك
ولما احتاجتى أرواحهم سابوها
...................................
وبعد الصبر........بعد الصبر
....................................
ورا القضبان وقف سجان بلاده
فى أيه من أيات رب البرايا
ديوله معاه وكان بينهم ولاده
وطل الليل عليهم ف النهاية
...............................
ده حال اللى شيطانه يوم يسوقه
ومهما ربنا أمهل لا يهمل
وزى ما دوقنا الذل راح يدوقه
وزى ماكان بيعمل مش هنعمل
......................................
وديمها يارب بالفرحة علينا
قصاص عادل يرد الحق لينا
ومش هنسيب حقوقنا أو نسامح
الكريم فوقنا وليه رافعين ايدينا
......................................
بلدنا ..يا بلدنا يا أصيلة