اوباما تانى

بسم الله الرحمن الرحيم
اوباما تانى
******

اسمع منى وقول لادرتك
ولنوابك كده وشيوخك
حلقة وحطها جوا ودنك
واحفرها ف ذهنك ونافوخك
مصر خلاص وبألف سلامة
عدت عهد الانبطحات
ولا عدش هينفع يا اوباما
انك تقدر بالاعانات
تشترى حلم ولادها بزادها
او تراودها بالدولارات
عن عفتها وعن كرامتها
وعن وقفتها مع الاخوات
مصر خلاص يا اوباما اتسترت
كتبوا كتابها على الامجاد
كلها سنه كده ولا التانية
تحبل تطرح بالاعياد
كل شبابها ف وسط ميدانها
حضروا زفافها وكانو شهود
قالوا بلدنا يا ناس وعشانها
نظهر نزائر نبقى اسود
من لحظتها بلادنا انتفضت
ولا يمكن تقبل توجيه
من غر ابن امبارح تافه
داير ينشر كدب سفيه
عمال يحلف قال ويأكد
انه ف عز الازمة سانِِِدنا
وان الثورة دى من تخطيطه
وكانت ورقة ف قلب اجندة
هو اللى كتبها وسطّرها
وصاغ فيها حلمنا ورعاه
شَخّص فيها اصول العله
وكتب لنا رؤيته ودواه
مش ناقص والله يا عالم
غير انه يزود فى بغاه
ويقول انه ف وسط ميدانها
أمْ الجمعة وكنا وراه
وفضل يدعى ع اللى خربها
واحنا نرد نقول له امين
اما دا فشر ابو لمعة الاصلى
كداب كدب يا بنى ادمين
ونهايته يا كداب الزفه
ويا حريف هبش الاحلام
حول عنا يا عم الدفه
وابعد بقى وفارقنا قوام
اصل الشعب دا عاش موجوع
جاع واتباع وغرق فى دموع
30 سنة وخلاص اهو قرر
مره بكيفه يدوق الجوع
وحلف انه بيد خواجة
تبقى اللقمة حرام فى حرام
وان الجوع بكرامة وعزة
تبقى عبادة جهاد وصيام
قرر انه يورى الكل
انه هيقدر ع التطوير
وانه ما يقبل لقمة بذل
وان كان فعلا شعب فقير
وان حزامة واخد ع الشد
وعمره ما يتعب م الازمات
واهون عنده قطع اليد
ولا يقبل منك اعانات
وان اخواته اللى انت بترجف
لما صالحهم على بعضيهم
اغلى واعلى مقامهم عنده
من دولاراتك لو ترميهم
ولا يمكن مره هينساهم
او بسهولة يفرط فيهم
وان الجى وبكره معاهم
مش ليك لكن لينا وليهم
وعشان كده فكك يا لمامه
او يا اوباما من التخبيط
علشان مهما هترغى وتكدب
مش راح تاخد غير توريط
شعبنا واعر ما انتش قده
بيره يا صاحبى غميق وغويط
واللى يخش له قافيه بيخسر
مهما يكون مكار وحويط
يصبح مسخه ومسخره يعنى
بيخلوه اخر تزبيط
يخسر هيبته وتظهر خيبته
ويصبح وسط الخلق عبيط


هههههههههه

تمت


محمود قطب