ازاي تموتي؟

لسا الزمن
موجوده ريحته في كل جلاليب الجدود
لسا حكوايهم علي امجادنا والشهدا الجنود
لسانا جيل من بعد جيل شاقيان علينا التعبانين
داعيالنا ربات البيوت
ف ازاي تموت
ماهي ياما تعبت مننا
ولا عشان ما اتدهورت
وحالتها راحت للخطر
هتشيل كفوفنا خدنا
مصر امنا
واحنا الولاد فمتقلقوش
بين السواقي والسواعد والشجن احنا البيوت
بين الي طارح م الاراضي والزمن
احنا الورود
بيني وبينكم حبها وان كان لها
عيل جحود هنأدبه
بس الحقوها كلكم
لا الصدر ميكفيش لبن
آآآآآه يا زمن
من امتا كان طعم الوطن مايع اوي
مصر الي كانت طعمها سكر نبات
وساعات تبات يشرخ في زورنا مرها
تلقانا راضيين من سكات
دلوقت صابح طعمها زي الـ مفيش
او يمكن احنا من الزعل عاجزين ندوق
او يمكن ايه او ايه الي مش ممكن
انا جاي اطمنكم وانا..
هتجن واطمن
زعلانه يامّه واحنا ليكي زعلانين
عاوزانا يامّه واحنا اصلا محتاجين
بس انتي هتقومي لنا
دانا كل ما بيأس وبلعن بافتكر
ان انتي شامخه رغم زلات العذاب
وازاي تموتي وربنا جوا الكتاب
خلا الي داخل فيكي ضمن الامنين
ف ازاي تموتي يالي حبك فينا دين

أحمد عبد الرازق