وانا قاعد وياها بكيت

وانا قاعد وياها بكيت
من جوايا وكلم نفسي
واحضن عينها بعيني واقول
حبك أكبر ذنب لقلبي
ليه مكتوب نبقى الخاينين
و ندوس ليه على ناس غاليين
ذنبها ايه اللى بتعشقني
وانت كمان من قربي يا صاحبي
،
طيفك ذلذل قلبي فتني
بعد ما كنت لغيرك خدني
نساني العالم ولقتني
بنسى أعز الناس ونسيتني
،
امته هتوب من حبك امتى
كلي ذنوب مش قادر أنسى
نظرت عينه وانا وياه
وامشي تجيني واحبك لسه
نفسي تقولي بعينك حاجه
من غير مد ادين واللمسه
أنا تعبان وكفايه سذاجه
انتي لصاحبي وشطه المرسى
،
لما بكون وياه ويحكي لي
ذكرى زمان كات بيني وبينه
بسمع كل كلامه وعيني
مش قادر أرفعها ف عينه
وارجع اكلم نفسي ما بيني
ليه مارفعشي الراس واشكيله
زي ما كان ف الماضي يجيني
يسمع مني وكنت ابكي له
،
شوفتي الحب ازاي نسانا
واحده بريئه ادتني حياتها
لما تشوفني بتفرح ياما
تيجي تقرب أبعد عنها
تمسك تاني بايد مليانه
وابقى معاها وفكري ف غيرها
ليه بنبكي قلوب هيمانه
لي بنهديها جروح تسكنها
،
قولي خلاص التوبه أوانها
من دلوقتي ومش هبقالك
وانسي اشعاري بكل ابياتها
حتى وعودي اللي ادتهالك
روحي هترجع للي عشانها
قالت بوهب روحي عشانك
واللي بيفدي الروح ابقالها
واللي يعيش لك هوا ابقالك

الشاعر الجميل بحق

رضا عثمان

أولاّ الموضوع رائع . والاطروحه انت كتبتها من زاوية بكر

وعالجتها بشكل درامى ربما لم نتعود عليه منك .

ولكن عندما تناولت تلك القضيه تناولتها من مفهوم الصداقه

الحميمه والتى يتندر وجودها تلك الايام .

ثم عوده للاخلاق والقيم التى تربينا عليها .

وهنا اوضحت ببراعه ان اقسى شيء على القلوب هى الخيانه .

نص يُحسب لك وانت شاعر بارع ووضحت براعتك فى استمرارية

تمسكك بالتفعيله وسبحت بنا على البحر المتدارك بهدوء ورويه

حتى وصلت بنا الى شط الإعجاب .

احييك على روعة النص والحبكه الدراميه .

مودتى وتحياتى ايها القدير ...